Durante presentacion cu Parlamento a ricibi di Prof. Dr. Ryan Peterson di Universidad di Aruba a resalta con importante e aspecto di cultura ta pa nos hobennan. E interes grandi aki cu ta existi bou nos hobennan ta di admira y mester percura pa mantene y exploita esaki mas hopi posibel.

Aspectonan di cultura  

Segun Prof. Peterson e aspecto di Arte ta sumamente importante pa nos hobennan y ademas por observa e interes grandi cu tin tur aña pa festivalnan infantil y hubenil di carnaval, pa festivalnan di un Canto na Himno y Bandera di Aruba y naturalmente nos festivalnan di Dande.

Pesey Parlamentario Kelly ta di opinion cu mester gara e informacion aki cu tur dos man y sigui traha riba dje pa sostene, apoya y motiva nos hobennan pa sigui desaroya nan interes y cualidadnan pa asina saca e miho di nan potencial. Kelly ta splica tambe cu segun e plannan cu Gobierno di Aruba a fiha, e Ministerio di Cultura ta trahando hunto cu Ministerio di Enseñansa pa asina integra diferente aspecto di nos cultura en general den e curiculo di scolnan secundario.

Conexion cu Na-schoolse opvang  

E proyecto di Na-schoolse opvang ta hunga un rol sumamente importante den e caso aki. Justamente pa motibo cu e meta primordial no ta solamente pa logra un cambio social bou di nos hobennan, sino alabes brinda oportunidad pa hobennan por explora y desaroya nan interesnan den entre otro deporte, arte, musica etc. despues di oranan di scol. Segun Parlamentario Kelly a compronde, e proyecto aki a start caba na EPB San Nicolas, caminda cu tin un grupo di mas o menos 25 pa 30 hoben ta hasiendo uso di e oportunidad cu e Na-schoolse opvang ta brinda di dialuna pa diabierna. E meta ta pa den futuro mas scolnan na Aruba por wordo usa pa brinda e oportunidad aki na tur nos hobennan.

Expresionnan haci den e articulo aki no necesariamente ta refleha opinion di ArenaPoliti.co