Den un declaracion firma pa tur lider di fraccion di Tweede Kamer di Parlamento Hulandes, nan ta condena energicamente e uso di instigacion, mensa, intimidacion y violencia como un forma pa hiba politica. Esaki a sosode e siman aki na Den Haag, Hulanda.
Na Aruba na mas cu un ocasion e fraccion di AVP a purba yega na un comprondemento cu e otro fraccionnan den Parlamento pa logra e mes un cos. Esta pa condena y evita pa usa amenasa, intimidacion of violencia den politica enbez di usa argumento, sano huicio y un vocabulario di respet pa tur.
Recientemente na fin di augustus, e partido MEP a haci uso extensivo di amenasa, intimidacion, agresion, violencia y destruccion pa pone hende bao presion, pa pone hende accepta e punto di bista di MEP y pa forsa un desicion cu e partido MEP tabata desea. E resultado di tur e instigacion, amenasa, violencia y agresion aki ta bon conoci y a pasa pa algun di e dianan mas scur den historia politico di Aruba. Nan tabata dianan cu e partido MEP y su aliadonan kier a pone democrasia un banda y impone nan kier riba nos pueblo. Parti chikito di e sucesonan aki a wordo documenta y poni den un documento cu a wordo manda pa instancianan na Aruba y den Reino.
Partido AVP y hopi organisacion responsabel den comunidad y den Reino a condena e instigacion, amensa y violencia di e partido MEP, cu si ta wak esaki como e forma pa hiba politica. Den e discucion riba leynan laboral e simannan cu a pasa, MEP a bolbe usa e mes un tacticanan aki. Ta parse cu nan no a siña di e sucesonan di dos luna pasa. Ta parse cu e disculpa di e lider di MEP no tabata sincero. Pasobra apensa dos luna despues su partido ta bolbe usa amenasa, intimidacion y agresion verbal pa forsa nan kier.

Expresionnan haci den e articulo aki no necesariamente ta refleha opinion di ArenaPoliti.co