MEP: Gobernador a gana e bataya, Mike Eman a perde e bataya
Parlamento di Aruba diahuebs atardi a ricibi e cambionan pa e presupuesto 2014. E nomber ta bisa tur cos: mientras Mike Eman tin un siman ta yama e ley "presupuesto supletorio" awor e berdad ta bin riba mesa, pasobra e ley yama "cambio riba e presupuesto 2014". Y ta logico, pasobra huridicamente e ley no por yama presupuesto supletorio: bo no por divorcia si nunca bo a casa. Mescos bo no por tin un presupuesto supletorio si bo nunca a ratifica e presupuesto 2014 mes.
Mike Eman mester a sucumbi pa presion, ya Mike Eman no por mas, y a wordo bari for di mesa como un homber loco y sin credibilidad. Un berguensa real pa henter nos pais! Y naturalmente aki Gobernador a sali triumfante, manera cu nos a bisa desde un principio.
Awor tur wowo ta riba esnan cu a grita cu e presupuesto 2014 ta un "gepasseerd station" y cu Gobernador mester firma. Pasobra awor ta nan mes mester bai aproba e cambionan den e presupuesto 2014. Nan a grita hopi duro cu e ta un "gepasseerd station", y awor mester bai wak ta con nan lo hasi. Un grupo di parlamentario di AVP cu ta custuma di grita VOOR sin studia nan documentonan, e pregunta ta con nan ta bai hasi awor? E mesun parlamentarionan cu den 6 minuut a fix aumento di nan salario, y despues a bisa cu nan no tabata sa kiko nan ta votando riba dje. Nan lo hasi mescos atrobe?
Un cos ta sigur, e credibilidad di Mike Eman ta kibra completamente. Ni na Hulanda, ni na Aruba hendenan tin confiansa den dje mas. E ta den terapia intensivo pa su problemanan di salud, y den esaki bo ta wak e ta core go-kart cada biaha.
Mike Eman tin casi 5 luna sin drenta Parlamento, sin defende ningun ley den Parlamento. Mike Eman tin 5 luna sin goberna e pais aki. Pero su ora di berdad tambe ta yega, pasobra e berdad semper ta alcansa tur mentira.
Expresionnan haci den e articulo aki no necesariamente ta refleha opinion di ArenaPoliti.co