Cifranan di Banco Central ta indica 

Un biaha mas e relato di Banco Central ta duna indicacionnan positivo pa lo cual ta trata turismo di Aruba.
Den e cifranan di e prome kwartaal di aña 2015 por a nota un crecemento grandi  den e tourism receipt, cu ta e cantidad di placa cu turistanan ta laga atras den nos economia, di 6.62% compara cu aña pasa den e mesun temporada. Aña pasa den e prome 3 lunanan di 2014 Banco Central a confirma un cantidad di 810.7 miyon Florin y pa e aña aki e suma aki a subi cu 53.7 miyon Florin. Esaki ta encera cu pa e prome kwartaal di aña 2015 turistanan a laga un total di 864.4 miyon Florin den nos economia. E ta marca tambe e tourism receipt di mas halto den e periodo di prome kwartaal di tur e ultimo añanan. Un inyeccion efectivo di casi 54 miyon Florin.
Pa e di dos kwartaal di aña 2015 Aruba ta conta cu 672 miyon Florin laga atras den nos economia. Si compara esaki cu e cifra di e mesun temporada na aña 2014 cu a marca 659.3 miyon Florin, por bolbe nota un crecemento di 12.7 miyon Florin pa e di dos kwartaal di e aña aki. Un otro inyeccion di casi 13 miyon Florin y ta demostra di tabata lunanan positivo pa lo cual ta trata turismo y economia di nos isla.
No ta un secreto cu den e strategia actual no ta enfocando riba e cantidad di turista cu ta bishita nos isla sino mas bien riba e turista mas afluente. E cifranan di e relato di Banco Central ta demostra netamente esaki, turistanan ta gastando y contribuyendo na economia di Aruba.

Expresionnan haci den e articulo aki no necesariamente ta refleha opinion di ArenaPoliti.co