MEP: Evelyn Wever-Croes invita como orador na reunion plenaria di COPPPAL na Santo Domingo
ORANJESTAD -- Otro siman ta tuma lugar e reunion plenaria di COPPPAL. COPPPAL, conferencia permanente de partidos politicos de America Latina, ta un organisacion di partidonan politico di cual partido MEP ta miembro.
Na luna di september COPPPAL a tene un conferencia na Aruba den cual a trata e situacion di e islanan Aruba, Boneiro y Curacao den Reino. Un punto crucial den esaki ta cu e tempo di colonisacion y esclavitud ta tras di lomba y cualquier intento pa re colonisacion of esclavitud moderna mester wordo eradica.
Durante e conferencia na Aruba lider di MEP Evelyn Wever-Croes a trese padilanti e historia di e lucha di Aruba pa su Status Aparte, y con e gobierno actual a entrega nos autonomia financiero debi na mal maneho y mal decision. "Apesar cu nos ta conciente cu ta culpa di e gobierno di nos propio pais, hecho ta cu awe Aruba tin me os autonomia cu na anja 1986. Nos a bai atras en bes di bai padilanti y den esaki pais Hulanda a hunga un papel hopi particular. Hulanda a compromete su mes cu Nacionan Uni pa yuda e islanan pa emancipa y para riba nan pia. Pero na Aruba nos ta mira net contrario. Un gobierno cu ta entrega mas autonomia pa asina por keda na mando. Con cu bo mir'e Hulanda ni Aruba ta cumpliendo cu palabracionan hasi na Nacionnan Uni y pesey nos a cuminsa encamina e caminda pa Nacionnan Uni. Nos ta purba hasi esaki directamente, pero tambe nos ta buscando aliansanan den Parlatino, den Socialista Internacional y den COPPPAL" lider di MEP a duna di conoce.
Presidente y directiva di COPPPAL a keda impresiona pa e presentacion di Lider di MEP y pa e motibo ey a invita Evelyn Wever-Croes pa ta un orador na e reunion plenaria cu lo tuma lugar na Santo Domingo cu participacion di tur pais di Sur America, Latino America, Caribe y representantenan di e organisacion ICAP di Asia.
Otro siman Lider di MEP lo expone e caso di Aruba pa haya sosten di henter COPPPAL y ICAP den e caminda pa Nacionnan Uni. Sigur un gran honor pa partido MEP.
Expresionnan haci den e articulo aki no necesariamente ta refleha opinion di ArenaPoliti.co