Recientemente por a lesa den diferente medionan di comunicacion y social na unda ta tira tur culpa riba Aruba Tourism Authority pa e situacion cu turistanan Venezolano cu ta drenta como turista Aruba, pero enrealidad cu un meta pa busca refugio pa cu e situacion cu ta tumando lugar na Venezuela. Na mes momento ariba pagina social di facebook por a lesa un coreccion di Minister Otmar Oduber cu ta corigi un periodista splicando e responsabilidad di ATA y su tarea cual ta pa mercadea strategicamente nos isla como destinacion pa atrae turistanan di calidad for di tur pais, incluyendo Venezuela. Sinembargo den e coreccion di Minister Otmar Oduber y e periodista aki no ta trece e claridad berdadero y mi ta completamente convenci cu mi mester splica e berdad y alavez defende como politico y un ex trahador di ATA cada un di e trahadornan di ATA sin excepcion alguno.

Periodismo di calidad
Mi intentencion no ta pa ataca ningun periodista y tampoco ningun ciudadano, pero e berdad mester wordo treci padilanti. Den mi concepto, promer cu un periodista pone su mes den tal posicion pa ataca un departamento asina importante manera ATA y pa cu nos turismo, lo ta bon pa e tuma tempo y averigua promer kico ta e resposabilidad, trabao y tarea di ATA (tuma esaki como un conseho constructivo). Ora menciona ATA of cualkier otro departamento of instancia den luznan negativo, bo ta referiendo na staff y personal di hende homber y muhernan balente cu tin di sacrifica oranan largo tur dia di nan bida personal, social, di nan famia y nan yiunan pa bienestar di e 100 y pico mil hende cu ta biba riba e pais aki cu ta depende di e unico entrada economico cu ta nos turismo. Mi ta sigur cu e trahadornan di ATA no ta nada contento cu e expresionnan aki.

E unico dos culpabelnan
Minister Otmar Oduber  manera semper a purba di hunga e papel di un bon Samaritano y a contradeci corectamente e periodista aki, cu porcierto na mi parecer e tabata purba di tira e culpa riba ATA pa scapa  e peyeho di Minister Oduber mes y AVP. E Venezolanonan aki no tin niun culpa, nan ta desespera y ta buscando un otro pais pa inmigra. E periodista no ta culpabel tampoco pasobra e ta defendiendo su gobierno y su entrada economico. Departamento di Inmigracion tampoco no ta culpabel, pasobra e maneho di AVP ta pa laga tur hende drenta y sin control y nan tin di sigui instruccion. E unico culpabelnan aki ta e propio Minister Oduber y Minister Presidente Eman.

Just pa refresca pueblo nan memoria

1. Ta ken a kita e Swiss model? No ta AVP?
2. Ta ken a kita  e helicopter pasobra no tin placa pa pag’e? No ta AVP?
3. Ta ken a elimina Visibility Team? No ta AVP?
4. Ta ken a elimina Guarda Nos Costa? No ta AVP?
5. Ta ken a elimina e radarnan? No ta AVP?
6. Ta ken a elimina e Nightvision interface cu por busca hende den scuridad y unda cu nan ta bo por detectanan? No ta AVP?

Pueblo di Aruba, abo ta kere AVP ainda?
Minister Otmar Oduber, cu abo a defende ATA ta admirabel, pero bisa pueblo e berdad kico boso a haci y ta haciendo, ta boso ta na mando. NO CULPA MEP DI E ASUNTO AKI, TA BOSO A CREA E SITUACION AKI. Ta boso di AVP a habri porta y a kita tur control riba e sistema di inmigracion.
Mi colega parlamentario sr. Dangui Oduber ya pa basta tempo caba tabata informa y adverti Minister Oduber y e gobierno di AVP di e situacionnan aki y mucho mas, sinembargo e gobierno aki ta esun di mas malo cu Aruba a conoce den historia. Nan no kier tende nada y no ta importa nan mes riba e consecuencianan cu tur e situacion aki tin pa nos ciudadanonan. Nan ta pensa solamente riba nan propio bienestar economico, sin importa nan kico lo para di e pais aki.

Nacionnan Uni
Con por ta posibel cu nos Minister President por a atende un reunion di Nacionnan Uni, sinembargo el a bay riba un welga di hamber contra su propio bida y a invita  henter mundo pa bin biba  na Aruba pasobra na Aruba nos tin bida y trabao pa tur hende mientras tin un cantidad di persona ta pasando hamber, ta biba den scuridad, sin awa y awor peor cu nos tin persona di exterior riba caya, anto bo por ta miembro di Nacionnan Uni?

Pueblo di Aruba nos no ta perdiendo nos identidad, nos a perd’e caba na man di e mal maneho di Gabinete Mike Eman 1 y 2 regalando nos autonomia y awor Aruba ta bay perde loke nos a keda cun’e cu ta nos Turismo, pasobra nos turismo awor ta di chiripero. Dios spaar nos y nos isla.

Expresionnan haci den e articulo aki no necesariamente ta refleha opinion di ArenaPoliti.co