Minister Mike de Meza: Prome kwartal di 2016, ta anuncia resultado di investigacionnan sismografico den awanan teritorial di Aruba
Despues ta sigui un fase caminda ta haci perforacion di prueba pa gas natural
ORANJESTAD – Minister di Economia, ing. Mike de Meza, e siman aki a duna un ‘update’ di e trabounan di exploracion pa Gas Natural den awanan teritorial di Aruba. Exploracion pa Gas ta den man di un consorcio cu ta inclui Repsol di Spaña, Total di Francia y British Gas di Inglatera cu recientemente a wordo adkiri pa Shell. E proceso ta uno largo, y Repsol a cuminsa cu e trabounan for di 2013 caba y den e transcurso a haci investigacionnan sismografico di tipo 2D y 3D.
Cu e dos serie di investigacionnan aki, e consorcio a adkiri un cantidad inmenso di data y na e momentonan aki ta procesando esaki. E plan tabata pa fin di e aña aki, Repsol por a duna gobierno e informacionnan definitivo. “Nan a informa nos cu nan ta bay haci uzo di algun luna mas pa caba cu tur e trabounan y ta premira cu pa fin di e prome kwartal di otro aña nos lo haya sa e decision di e companianan,” segun ing. de Meza, “e siguiente fase ta uno caminda ta bay haci perforacion di prueba y si yega asina leu, lo ta un etapa hopi interesante pa nos pais.”
Minister Mike de Meza, a splica cu algun siman atras e tabata na Madrid pa un dia pa reuni cu e ehecutivonan di Repsol y a haya un presentacion amplio di e ultimo desaroyonan. “Mi tin di bisa cu nan ta hopi contento di e datonan cu nan a haya den nos awanan teritorial y e interes cerca nan ta hopi, hopi halto,” Minister de Meza a enfatisa.
Exploracion pa Gas Natural den awanan teritorial di Aruba a wordo haci den un zona di mas o menos 3.200 kilometer cuadra riba un distancia di 10 kilometer panort di Aruba. Investigacionnan a wordo haci tanto na 2013 como 2014, y na e momentonan aki ta procesando un cantidad inmensamente grandi di data.
Expresionnan haci den e articulo aki no necesariamente ta refleha opinion di ArenaPoliti.co