Gobierno ta para lomba contra muraya! 

Despues cu e dos rondanan pa haya ambtenaarnan bay cu VUT a fracasa, awor Gabinete Eman ta bolbe haci un intento descabeya pa logra na baha e cantidad di empleadonan cu ta den servicio di gobierno haciendo uso di e areglo di VUT. Contrario na e otro biahanan cu a permiti solamente esnan te schaal 7 bay cu VUT, e biaha aki gobierno den un acto di desesperacion ta laga tur ambtenaar di tur rango haci uso di e posibilidad pa bandona gobierno. Cu e maniobra aki gobierno mes ta tuma e risico di perde un gran cantidad di profesional integro y capacita y consecuentemente ta debilita e funcionamento di henter e aparato gubernamental. Algo asina cu por sali solamente for di mente y actitud di gobernantenan iresponsabel, sin vision y sin capacidad. Sinembargo Gabinete Eman lo probecha di haci uso di e oportunidad aki pa nombra cierto di su compinchi/coordinadornan como ambtenaar y asina scapa di ehecuta e medida cu nan mes a propone na CAFT: “Halvering van arbeidscontracten”.

Cayehon sin salida
Sin duda cu e accion di continua cu e areglo di VUT aki a bin pa motibo cu Gabinete Eman ta para lomba contra muraya pa loke ta nan compromiso cu CAFT pa logra reduci e gastonan di personal substancialmente. Manera acorda cu CAFT, den presupuesto 2015 gobierno lo mester a corta den e gastonan di personal cu 86 miyon florin, pero te cu mitar di e aña aki ta 27 miyon florin so a ser corta. Pues si extrapola e suma aki pa henter aña 2015, probablemente 54 miyon florin so gobierno ta logra den su intento di corta den e gastonan di personal. Pues for di unda gobierno lo saca e 32 miyon florin cu ta keda falta? Y pa loke ta presupuesto 2016, gobierno lo mester corta un otro 90 miyon florin mas den e gastonan di personal. Aki Gabinete Eman ta den un cayehon sin salida y ta pesey mes tambe te ainda nan no a logra entrega e presupuesto 2016 na Parlamento.

Een doekje voor het bloeden
Sinembargo tur cos ta mustra cu e areglo di VUT lo no bay trece sumanan substancial aden pa gobierno y p’asina cumpli na baha e gastonan di personal. Siguramente e promer aña di VUT cu ta 90% di salario, gobierno lo keda cu solamente 10% di e salarionan di e empleadonan cu lo bay cu VUT. Un ehempel: Si e averahe di salario di e ambtenaarnan ta 50 mil florin pa aña, un empleado cu bay cu VUT lo keda haya 45 mil florin na salario den e prome aña ey y e restante di 5 mil florin lo bay den caha di gobierno. Awor si 200 ambtenaar mes bay cu VUT, den e promer aña gobierno lo baha su gastonan di personal cu solamente 1 miyon florin! Esaki nos ta considera como “een doekje voor het bloeden”, ya cu e 1 miyon florin aki no ta contribui na baha e gastonan di personal substancialmente manera a ser acorda cu CAFT.
Pues mester conclui cu Gabinete Eman no tin e corahe pa cumpli cu su propio promesa na CAFT pa reduci e gastonan di personal y awor kier piki aki aya un garnachi pa trata na salba e situacion caotico financiero cu nan mes a crea durante e ultimo 6 añanan.

Expresionnan haci den e articulo aki no necesariamente ta refleha opinion di ArenaPoliti.co