Fraccion MEP: Minister Bermudez a anuncia cu ABB lo ta 7%!
Durante tratamento di cuentanan anual di anja 2013 fraccion di MEP a hasi diferente pregunta dirigi na Minister di finansas Bermudez. E minister durante su contestacion na parlamentario Wever-Croes a splica cu tin diferente grupo di producto y servicionan cu ta wordo cumpra y ofrece den nos comunidad. E la splica cu e productonan ta wordo cobra impuesto ora di importanan y e servicionan den e teritorio.
Akinan Bermudez a revela cu estudionan hasi ta indica cu un tarifa di 7% ABB lo bai ta aplicabel dentro di 1 januari 2016. Remarcabel ta cu e Minister en cuestiona a menciona e palabra "budget neutral" cual logicamente ta cuestionabel pasobra den rapport di CAFT ta papia di extra entrada y den principio caba extra ta nifica mas y de facto no por keda budget neutral mas.Segun e minister ta hasiendo ehercicionan di diferente scenario y e mes ta spera cu pronto lo bai entrega un proposicion definitivo pa introduci ABB di 7%.
Despues cu tanto Mike Eman a demonisa cu BBO di 3% lo a destrui nos economia, y lo a empobrese e cuidadano awe ta mustra su cara real con manipulador e tawata. Realidad ta cu nunca nos pais tawatin un problema sino mas bien un politico actor cu a traiciona su pueblo pasobra awor e pisca lo muri pa su boca pasobra banda di a castiga pueblo cu un lista largo di medida ta bin corona e obra cu un ABB di 7%! E ABB aki tambe e comerciante lo bai agrega riba e 3.5% di BBO y BAZV cu ta vigente caba. Nos ta condena cu Gabinete Eman ta causando pueblo un dolor asina enorme cu un aumento di 300%!
Expresionnan haci den e articulo aki no necesariamente ta refleha opinion di ArenaPoliti.co