Siman pasa durante un encuentro di Parlamento cu Minister De Meza y e ehecutivonan di WEB y Elmar, nos a probecha pa haci e mandatario pregunta riba e proyecto di ‘waste to energy’ na WEB pa Pueblo por haya sa cuanto esaki ta costa, ken ta carga e gasto y con lew e proyecto aki ta. Minister De Meza den su contesta a confirma cu WEB a paga 17 miyon florin pa haci e proyecto priva di ‘waste to energy’ di Ecogas posibel y cu probablemente otro siman e proyecto lo cuminsa opera.

WEB den rood pagando pa inversion priva
Ta durante e promer Europe Meets Americas na mei 2013 cu un MOU a wordo firma entre Ecotech Freezone NV, WEB NV y Freezone Aruba NV pa anuncia e proyecto na unda cu for di sushi lo produci gas cu lo sirbi como fuente di energia pa asina produci awa y coriente na WEB. Ta conoci cu despues WEB a haye den problema financiero debi na entre otro hedging y tambe un descrepancia den cobransa di Valero. Pero awor ta sali na cla y ta keda confirma pa Minister De Meza cu asina mes cu WEB tabata den rood, asina mes WEB a saca 17 miyon pa haci e proyecto priva di ‘waste to energy’ di Ecogas posibel. E pregunta ta si esaki ta un decicion responsabel pa un NV tuma na momento cu e ta pasando den dificultad financiero.

Pakiko WEB mester beneficia un compania priva?
Nos mester puntra nos mes tambe dicon e compania en cuestion mester wordo beneficia door di WEB cu e 17 miyon florin aki. Ya cu nos a compronde cu e compania ta goza di e ‘begunstigd beleid’ cu Gabinete Eman a anuncia, na unda cu ta favorece e compania pa no paga nada of casi nada na belasting ora di haci inversion catergorisa como inversion berde. Den un situacion asina y sigur si nos tene na cuenta cu WEB lo mester paga pa por haya e gas aki for di Ecogas, ta na su lugar pa cuestiona e invercion di WEB. Pues ta necesario y na su lugar pa WEB of Minister De Meza splica pakiko un compania priva tin di haya tanto beneficio asina for di WEB.

Conflicto di interes den Board di Supervicion di WEB mester wordo investiga
Remarcabel ta cu den e Board di Supervicion di WEB te cu poco tempo pasa tabata tin dos miembro di board cu ta directamente liga cu e compania Ecogas. Esaki ta un conflicto di interes grandi cu kizas ta e motibo tambe cu siendo cu WEB ta den rood e decicion di haci invercion di 17 miyon florin pa yuda e compania priva lo a wordo tuma. Pesey un investigacion pa trece claridad y prueba lo contrario ta na su lugar. Pasobra ta di ki otro manera WEB ta paga 17 miyon pa haci invercion priva di ‘waste to energy’ di Ecogas posibel?


7 december 2015

Expresionnan haci den e articulo aki no necesariamente ta refleha opinion di ArenaPoliti.co