Despues cu algun siman pasa e corant Hulandes De Telegraaf a publica un articulo den cual nan a desenmascara e “Bende rond Mike Eman”, despues cu e parlamentario Hulandes van Raak a cuestiona henter e bagamunderia di seguro di studiante rond minister Hooijboer, despues cu Minister Plasterk porfin tambe a cuminsa duda den e integridad di Gabinete Eman, awor ta e mesun corant De Telegraaf aki y tambe Antilliaans Dagblad ta poniendo presion riba gobierno Hulandes pa cu e caso bochornoso di Insure-to-Study.Ta pesey lo ta bon pa partido MEP den forma cronologico informa pueblo y duna un resumen di henter e procedura cu a ser hiba pa cu e escogencia di e seguro di Insure-to-Study aki.

Na december 2014 y januari 2015 Solo di Pueblo a publica articulonan implicando fraude den e cambio di seguro di studiante y envolvimento di casa di minister Hooijboer den esaki. Dia 21 januari 2015 lider di MEP, sra. Evelyn Wever-Croes a haci pregunta na sra. Hooijboer al respecto y a puntr’e dicon e no ta reacciona riba e articulonan ey. Sra. Hooijboer a contesta y a bisa lider di MEP cu e ta hiba Solo di Pueblo Corte. Hecho ta cu te cu fin di maart 2015 minister Hooijboer a entrega su caso den corte, esta un peticion pa un kort geding, cual ta hopi laat pa e cu e proceso sumario aki. E caso mes a wordo trata na april 2015 y e veredicto a cay dia 6 di mei 2015, cual ta un veredicto devastador, entre otro:

1. Cu e minister a tarda hopi desde e publicacionnan na december 2014 pa cuminsa e caso na maart 2015. Pues no tin base pa un kort geding y cu minister Hooijboer tin tur tempo y posibilidad di cuminsa un caso regular (bodem procedure).
2. Den forma superfluo,‘ten overvloede’ e hues a bay toch den e caso (‘ten overvloede’ kiermen cu e no mester duna e motibonan ey, pero toch e ta haci’e, y e ora e motibonan ta valido).
3. Solo di Pueblo a cuestiona cu (1) e compania ta nobo cu a ser lanta apenas dos siman prome cu e destaho, (2) e capital ta apenas 1 Euro, (3) e compania no tabata tin trahador ni linea di telefon duro (celular so), (4) e casa di minister Hooijboer tin contacto via internet cu e shareholdernan di e compania.
4. Hues ta haya cu Solo di Pueblo a prueba tur esaki cu hopi documento, pero cu e minister NO a prueba lo contrario. Hues ta sali di e punto di bista cu e casa di Hooijboer TIN contacto via internet, y esey ta trece duda cu si e contacto ey por a influencia e destaho.
5. Hues ta haya pues cu tur locual Solo di Pueblo a publica no ta fabrica, y tin base concreto. 
6. Hues ta haya cu tabata responsabilidad di minister Hooijboer pa duna aclaracion riba con cos a bay y refuta tur esaki, specialmente mirando cu Hooijboer tin un maquinaria di mercadeo hopi amplio na su disposicion. Mirando cu Hooijboer NO a reacciona, e mes a busca y tin cu carga e veredicto aki.
7. Segun Hues e unico defensa cu Hooijboer a hiba ta cu e compania Insure-to-Study ta parti di un grupo di e compania Jonker-Schotte cu ta existi desde 1951, pero Hues a bari esaki tambe for di mesa, y a bay mas leu. Hues a sali for di e punto di bista cu gruponan di compania ta lanta companianan nobo pa casonan asina, simplemente pa no wordo responsabilisa si algo bay malo. Hues a cuestiona dicon Hooijboer a acepta e compania mas nobo di e grupo aki, pasobra si algo bay malo cu e compania nobo aki e studiantenan ta keda desampara! 
8. A base di tur esaki Hues a dicta cu Solo di Pueblo NO MESTER RECTIFICA!

Riba e dia di e veredicto minister Hooijboer tabata den Parlamento pa defende su presupuesto 2015, y lider di MEP a cuestion’e riba tur e puntonan aki. Su unico contesta tabata cu e lo apela e decision. Lider di MEP a sali di e punto di bista cu sra. Hooijboer no ta gaña y cu e lo apela, pero awor ta resulta cu NUNCA el a apela, ni tampoco cuminsa cu un caso regular (bodemzaak). Cu esaki Hooijboer pues ta ACEPTA e veredicto di dia 6 di mei 2015, y ta acepta cu el a actua CUESTIONABEL den e caso aki. Awor t’asina leu cu te hasta na Hulanda e integridad di sra. Hooijboer ta wordo cuestiona severamente den medionan di prensa, den Tweede Kamer y den gobierno Hulandes y ta muestra palpable di e decadencia y degeneracion total cu ta categorisa henter Gabinete Eman.

Expresionnan haci den e articulo aki no necesariamente ta refleha opinion di ArenaPoliti.co