Despues cu prome minister a pospone e cambio di e sistema di hinca cobransa di nummerplaat den accijns e ehercicionan a continua pa toch bin cu un otro sistema pa asina gobierno por haya placa den caha mas liher y trece cambio den otorgamento di number di auto. Awor ta conoci cu lo no bai tin controleplaat mas pasobra a dicidi pa bin cu sticker. Den e comunicado aki nos lo elabora y cuestiona e sistematica di sticker aki.

Ta di lamenta cu enbes di crea un sistema cu lo ta "win-win situation" a opta pa crea mas trabou y hasta bai atras den eficiencia. Hecho ta cu e number cu ta aparece riba e sticker no ta mescos cu bo nummerplaat cual ta nifica pabo tin un bon control bo mester para tur auto pa verifica si e number di sticker ta e mesun ilustra riba e factura. Pregunta e ora ey ta : bo a hasi un diferencia? Pa colmo e 2 colornan cu ta bai wordo usa no ta asina practico y nos lo splica dicon. E color oranje su bedoeling ta pa identifica cu e usuario ta paga pa kwartaal pero esaki lo no mehora e proceso di controla riba caya pasobra lo bo no por distingui cierto casonan. Si bo tuma nota ta hasie mas dificil pa identifica si un persona cu por ehempel a paga mitar anja of 3 kwartaal. E mesun auto ey polis lo mester bai para "boshi" biaha pa por controla si tur cos ta na ordo creando dobbel trabou y logicamente frustracion. 

Claramente gobierno un biaha mas ta hisa benta algo cu no ta traha y sigur no ta nada eficiente. Es mas e ta crea e impreshon den pueblo cu 1) a cai super laat pa tuma un decision , no tawatin mucho opcion riba mesa y a scoge pa sticker 2) a opta pa un material barata cu ta facil pa kibra, cu por saca mas placa for di pueblo pasobra e costo di sticker ta abou compara cu e material duro di e nummerplaat 3) tin hopi duda den e procedura cu a cana pa scoge un compania di print. Akinan ta na unda falta transparencia. 4) door di djis hisa benta no a pensa riba e hecho cu e sistematica aki ta facil pa sabotea, corompi y falsifica. Aunke e por tin un "watermerk" esei no ta kita e chens cu nan por imita un version di dje. Pesei lo no sorprendemi at all cu den transcurso di lunanan cu e posibilidad tey cu pueblo lo bai wak cu polis hasta ta bai confisca yen sticker falso. Tur esaki ta pasobra gobierno mes a crea e espacio pa e tipo di cosnan aki por sosode. 

Laga nos no lubida cu pa gobierno e motibonan pa cambia sistema di nummerplaat tawata entre otro cu sistema actual ta causa hopi trabou y incomodidad pero tambe pasobra hopi persona no tawata pagando na tempo. Preguntanan valido e ora ey ta: Kiko a cambia awor cu sticker? Acaso lo haya placa mas liher den caha? Eigenlijk a crea mesun of mas hopi trabou pa polis. Pero pueblo por a nota cu Gabinete Eman ta astuto si pasobra e sticker "chimbo" ey ( cual nos tur ta obliga di pone) kizas ni a costa un kwart di loke sa paga na e material di nummerplaat. Dado caso ta crea e impreshon cu si a expande e margen pa gobierno haya  mas placa den caha. Ban ta honesto apesar di e hecho cu e sistema di nummerplaat tin puntonan pa mehora y drecha no ta kita afor cu nummerplaat ta hopi mas mihor comparando cu e sticker. Nos a verwacht di progresa y bai dilanti cu un sistema moderno y NO dal dos stap atras. Pueblo por conclui riba su mes cu cambio di plachi number pa sticker no tin niun balor agrega!

Expresionnan haci den e articulo aki no necesariamente ta refleha opinion di ArenaPoliti.co