Hasta ora ta cu pasonan chikito, ta dilanti nos tur ta bay! 

"Mi ta compronde bon cu sector di comercio y industria no a keda contento cu e desicion di gobierno pa aumenta e salario minimo legal cu 2.5% na 2016. Mi a prefera pa tur sector lo a sostene e desicion aki como uno pa sigura cu entrada di mas o menos 60% di trahadornan y nan famia, no cay atras mientras cu nos pais ta saliendo di e pio crisis di e siglo aki y e mal maneho di e ocho aña prome. Pasobra e unico forma pa nos pais realmente bay dilanti, ta si nos tur bay dilanti. Aunke ta cu pasonan chikito y gradual." Asina Rene Herde, lider di e fraccion di AVP den parlamento a bisa den reaccion riba e declaracionnan di lidernan comercial riba e desicion di gobierno pa hisa e salario minimo legal den aña nobo.

MANEHO BALANSA
Fraccion di AVP a sostene den forma critico pero consistente, e maneho balansa di gabinete Mike Eman pa reforma finansa publico. Cu balansa kier men cu den e desaroyo pa sali di e crisis, niun sector ta keda atras of ta wordo afecta mas. Pesey no ta corta gasto di gobierno, sin tene cuenta cu e consecuencianan pa nos pais. Pesey ta baha gasto den forma gradual, tur aña poco poco, pa no stroba e crecemento economico cu nos conoce. E fraccion di AVP ta haya tambe cu den e crecemento gradual cu nos conoce, tur sector di nos pais mester sinti cu nan ta bay dilanti. Aunke ta cu pasonan chikito. Ta pesey e fraccion di AVP ta compronde y sostene e aumento di salario minimo den 2016. Esey tambe ta parti di e maneho balansa.

DIALOGO
Den e ultimo seis aña a tuma hopi desicion grandi den area di economia, finansa publico, reforma di belasting, stimulacion di economia, forsa di compra y reforma di pensioen. Tur e desicionnan aki a wordo tuma den Dialogo Social. E ehecucion di tur e desicionnan aki a haya e sosten cabal di sector comercial. Sector comercial a carga parti grandi di e costonan. E introduccion di e pensioen general pa tur trahado den sector priva y e reduccion di prijs di awa, ta dos di e desicionnan cu sector priva a contribui pa realisa y cu nos ta orguyoso didje y di nan contribucion. Sector comercial di nos pais a demostra di ta un partner constructivo den reforma di nos pais. Di otro banda, e ultimo tres aña gobierno a duna un contribucion importante na e forsa di compra di trahadornan cu salarionan mas abou den sector priva cu e "reparatietoeslag". Mas cu 70% di trahadornan den sector priva a haya e extra den nan salario for di caha di gobierno. Esaki a sosode na e mes un momento cu gobierno tin cu baha su gastonan. Tog gobierno a haya e contribucion na salario di trahadornan den sector priva mucho importante y a mantene. E topico aki tambe a wordo acorda den Dialogo Social. Esaki ta mustra cu den dialogo nos ta logra mas pa mas hende na Aruba. Ta di spera cu den futuro e desicionnan riba cambionan salarial y otro condicionnan di trabou pa gruponan grandi den nos pais, lo sigui wordo tuma den consulta cu tur organisacion sindical y comercial di nos pais. Pasobra ta asina nos tur ta bay dilanti: hunto y den dialogo cu otro!

Expresionnan haci den e articulo aki no necesariamente ta refleha opinion di ArenaPoliti.co