ORANJESTAD -- Gabinete Eman tin algun anja ta corta cruelmente den subsidio di fundacionnan, hincando e fundacionnan den hopi problema financiero. Esepcialmente na anja 2014, varios fundacion a mira nan subsidio wordo corta, algun elimina completamente, y te dia di awe no a mira mehoransa. E fondonan no a wordo re-aloca mas.

MARY JOAN FOUNDATION
Un di e fundacionnan cu a wordo afecta seriamente tabata "Mary Joan Foundation" cu tin e tarea vital pa yuda esnan cu ta sufri cu cancer di pecho, y pa aumenta concientisacion pa evita cancer di pecho na Aruba. Hustamente e fundacion aki a bira victima di un maneho cruel di parti Minister Paul Croes. E fundacion aki na aña 2013 tawata haya alrededor di 45.900 florin como subsidio pero un aña despues na 2014 a corta e suma aki hasiendo e CERO, cu tur su consecuencia pa e fundacion. Anja pasa, na 2015, Mary Joan Foundation a bati alarma na comunidad cu e lo ta den un situacion precario. Lamentablemente ora a trata e presupuesto 2015 no a aloca ni 1 florin pa e fundacion aki. Pesey a cai den masha mal tera ora mas despues den aña 2015 na augustus Minister Paul Croes a bai hunga pa heroe y durante e actividad di Fundraising di e fundacion a anuncia cu gobierno di Aruba lo duna un suma di 30 mil florin, sabiendo cu no tin placa den e presupuesto.  Awor e suma ey a wordo inclui den e presupuesto pa 2016, pues pa duna Mary Joan Foundation e 30 mil florin ey despues cu minister Paul Croes mes a elimina full e subsidio na e fundacion pa dos anja consecutivo.

FUNDACION PA NOS COMUNIDAD
Fundacion pa nos comunidad  tambe a bira victima di Gabinete Eman. E fundacion aki tin un tarea yudando cu paketenan di cuminda pa hopi famia cu no tin cuminda. Na 2013 e fundacion aki tawata haya alrededor di 92 mil florinna subsidio y lamentablemente un aña despues a corta esaki te na mitar hasiendo e 46 mil florin, siendo cu pobresa a aumenta! Pa colmo e suma original nunca mas a wordo destina pasobra te dia di awe den e presupuesto ta solamente 46 mil ta bai na e fundacion aki. Ta como sifuera nos pais a sali for di pobresa for di 2013 y no tin necesidad mas den paketenan di cuminda, siendo cu ta net contrario! E ultimo dato conoci di fundacion pa nos comunidad tawata indica cu e fundacion ta duna 2424 pakete di cuminda  na mas o menos 400 famia. For di otro fundacionan manera "Ban uni man pa cria nos muchanan" nos a compronde cu necesidad pa muchanan cu ta bai scol sin desayuno a subi di 500 pa 800 mucha. Tur esakinan ta indicacion fuerte cu tin pobresa na Aruba. Pesey tambe a cai den masha mal tera cu anja pasa mei minister Paul Croes a bai recauda fondo pa e fundacion aki durante un actividad di “Paalzitten” di 9.550 florin, pasobra despues cu gobierno a corta 46 mil florin pa 3 anja caba di e fundacion aki, e 9.550 florin no ta yuda pa mucho.

PRIORIDAD EQUIBOCA
Gobierno di Mike Eman ta duna mas prioridad na biahamento, propaganda, huurmento, fiestamento, cu na yuda fundacionnan cu ta yuda esnan den necesidad. E desbalance ey den presupuesto 2016 ta locual tin nos hopi preocupa.

Expresionnan haci den e articulo aki no necesariamente ta refleha opinion di ArenaPoliti.co