Parlamentario Chris Romero (MEP): Gobierno tin e obligacion di percura p'e integridad fisico di cada persona 'riba nos pais
Durante tratamento di presupuesto 2016, nos fraccion di MEP a presenta un mocion hopi particular.
E mocion aki ta pa urgi Gobierno pa instala un comision cu e meta di studia e posibilidad pa Aruba bira miembro di IANSA (International Action Network on Small Arms). Esaki cu e meta principal di elimina e proliferacion di arma di candela na Aruba.
Siguiendo e medionan di comunicacion ultimamente, nos por tabata testigo di e gran cantidad di actonan delictivo cu a keda cometi cu armanan di candela. Lastimamente hopi di e crimennan aki a keda cometi pa hobennan local.
Nos sa cu tin hopi sospechoso, conoci serca polis, cu ta den posesion di arma di candela, pero no tin mucho cos cu polis por hasi pa desarma nan.
Ta pa e motibo aki nos di partido MEP ta sondeando diferente posibilidad pa asina por yega na un solucion pa cu e problematica creciente aki.
Nos ta kere firmemente cu a yega momento pa busca un solucion concreto y factible pa e problematica di criminalidad ariba nos isla.
Como cu nos pilar economico principal ta turismo, nos tin e necesidad di mantene internacionalmente e imagen di ta un isla sigur pa nos bishitantenan.
Si nos tira un bista riba islanan y paisnan bisiña manera Colombia, Venezuela, Trinidad & Tobago y Jamaica, nos por a ripara cu nan a logra hiba campañanan exitoso cu e meta di desarma e comunidad. Logicamente e campañanan aki no a logra caba totalmente cu e proliferacion di arma, pero sigur a contribui grandemente na nan lucha contra criminalidad.
Tur esaki a pasa bou guia y experticio di IANSA cu, como organisacion specialisa den e area aki, ta pone nan conocemento na disposicion di tur pais cu ta rekeri nan ayudo.
Tumando nos bisiñanan como ehempel, nos fraccion a dicidi di pidi Gobierno pa articula un comision cu lo mester studia e posibilidad pa Aruba bira miembro di IANSA.
IANSA ta un organisacion no gubernamental, esaki ta un di e factornan principal cu e comision mester tene na cuenta den nan analisis.
Aunke IANSA ta un organisacion no gubernamental, nan plannan di desarme colectivo ta rekeri apoyo politico, pero cu un fundeshi pedagogico y comunitario.
Gobierno di Aruba tin e obligacion di percura p'e integridad fisico di cada persona 'riba nos pais, sea ta local of turista. Teniendo na cuenta tur e actonan criminal cu a keda cometi contra nos turistanan den e ultimo temponan, e ta di vital importancia pa nos cuminsa tuma accion contra e ola di criminalidad cu ta asotando nos isla.
Expresionnan haci den e articulo aki no necesariamente ta refleha opinion di ArenaPoliti.co