Dialuna anochi a tuma luga lansamento oficial di e logo di UNOCA nobo. Un logo cu ta representa un etapa nobo pa e entidad cu pa 30 aña a sa di brinda sosten na artistanan y tur esnan cu den diferente ramo ta forma parti di cultura di Aruba. Minister Otmar Oduber tabata presente na e ocasion special aki y a bisa cu desde cu el a asumi e responsabilidad como Minister di Cultura, el a cuminsa conoce hopi mas di cerca e funcion amplio di UNOCA. Awor nos ta na un momento hopi special mirando cu tin nombracion di un hunta di supervision nobo y a nombra un director nobo den persona di Sra. Nathaly Harms. Sr. Oduber ta comenta: "Sigur den e ultimo 2 añanan aki nos a mira UNOCA pasa den diferente fasenan no facil, pero mi ta kere cu pa por logra resultadonan positivo bo mester tin naturalmente e gana, pero tambe bo mester por sa unda bo kier yega cu e organisacion na momento cu bo ta haci transformacion nan nobo."

Cambionan cu ta encera cu for di tres aña pasa UNOCA no ta ricibi mas fondonan di Hulanda y tampoco fondonan den combinacion for di Hulanda y Aruba. E mandatario ta sigui comenta cu desde 3 aña pasa presupuesto di UNOCA ta 100 porciento dependiente for di comunidad di Aruba, 100 porciento riba e presupuesto di Pais Aruba. Esaki ta trece cu ne cu tin cu adapta y cambionan tin cu tuma luga. Minister Oduber ta bisa cu desde 2 aña pasa, na momento cu a tene e Cumbre di Cultura caminda un cantidad grandi di steakholders a bini hunto a base di cual Departamento di Cultura tambe a fiha e puntonan di accion cu a wordo conoci desde aña pasa, e "terug copeling" cu nos kier mira riba e tereno cultural na Aruba no por cana separa for di e maneho aki cu a wordo fiha. "Durante mi desertacion den Parlamento ma menciona cu e tereno di Cultura no ta facil, pasobra riba e diferente terenonan bo ta haya cu tin diferente stroom y e unico forma cu bo por uni e stroom nan ey hunto ta ora tin un maneho hopi cla poni dilanti caminda cu tur hende sigui esaki cu e reglanan, formanan cu ta atende cu proyectonan specialmente na UNOCA cu mester cana un proceso."

 UNOCA na maart, banda di Fundacion Museo Arubano, ta e dos prome stichtingnan cu lo funciona segun e codigo di Good Corporate Governance. Di e forma aki por ta sigur cu sector priva tambe lo continua cu nan cooperacion dor di ta mas transparente posibel.  Intencion ta pa tur e reglanan ta conoci pa tur hende, pa tur hende tin acceso y cu na e forma cu ta midi tambe e desaroyo y ayudo cu ta wordo brinda ta uno transparente.  Pesey awe Minister ta asina orguyoso di e trabou cu a tuma luga na UNOCA unda e criterionan ta poni pa tur hende por sa cu exactitud e exigencianan y locual ta spera di tur hende cu lo por yega na remarca pa ricibi sosten di UNOCA.

"Di mi parti sigur UNOCA por sigui conta 100 porciento cu sosten di Gobierno pa no solamente nos sigui pone e suma di riba un miyon Florin riba e presupuesto, pero cu den futuro mas y mas nos por conscientisa nos Gobierno y nos Parlamento y sigur sector priva  pa mas ayudo pa e sector Cultural di nos isla."  

Minister Oduber a termina bisando "UNOCA pabien y hopi exito na e directiva nobo y nos ta cla pa sigui traha na bienestar di nos Cultura di exito".

Expresionnan haci den e articulo aki no necesariamente ta refleha opinion di ArenaPoliti.co