Gerick Croes (MEP): AVP a bira lomba pa pueblo y vota contra pa baha cobransa pa recoge sushi na 10 florin!
Cu aprobacion di presupuesto 2016 tur gastonan di luho ta sigui subi y debe nacional di Aruba ta yega 4.1 biyon florin. Asina aki fraccion di AVPta duna lus berde continua na castiga pueblo sin misericordia. Durante tratamento di presupuesto parlamentario di MEP Chris Romero a presenta un mocion pa baha cobransa pa recoge sushi y introduci un tipo di exoneracion pa gruponan vulnerabel den nos comunidad.
Na un comienso Minister Sevinger a cataloga e mocion como uno populista y a declara cu MEP no ta bin cu solucion. Contrario na e ponencia ey fraccion di MEP a splica cu luho di detayes e argumentonan ( por mira e mocion) pa yega na un "win-win situation" pero parce cu e minister no a lese mocion na drechi y kier hasi interesante. Mescos a resulta cu fraccion di AVP pasobra nan no a tene cuenta cu argumentonan duna y a ignora e hecho cu e cobransa ta un peso financiero pa e cuidadano. Loke ta di lamenta ta cu niun por a duna un stemmotivering convincente pa bari e mocion for di mesa. Dos parlamentario di AVP a indica cu ya caba a baha e prijs pa recohe sushi y un otro a bisa cu ya caba a baha e prijs na 10 florin pa bai benta sushi na dump. Sigur comentarionan no alcaso y sin peso pa desbarata un mocion cu lo a trece alivio pa pueblo.
Ta ironico si cu ora AVP tawata den oposicion nan a hera muri pa un cobransa di 10 florin indicando cu pueblo no por carge. Awe e mesun personanan aki sin sinti y cu ignorancia ta claba pueblo un cuchiu den lomba mandando tur hende paga e 25 florin! AVP a haya e oportunidad pa demostra cu nan ta tene consideracion cu comunidad di Aruba pero a opta pa laga Gabinete Eman y Minister Sevinger sigui castiga pueblo. E ta sumamente lamentabel cu integrantenan di AVP a solamente pretende y hunga un wega politico cu sentimento di pueblo djis pa yega na poder y awor cu nan mester a demostra cu accion ta bira lomba pa pueblo!
Expresionnan haci den e articulo aki no necesariamente ta refleha opinion di ArenaPoliti.co