For di basta tempo nos ta bin ta bisando cu nos turismo no ta uno solido y no ta uno duradero. E crecemento cu tin den nos turismo ta uno ficticio y ora bo analiza e datosnan esey ta e unico conclusion cu por saca. Anja 2015 a sera cu un crecemento den cantidad di stayovers pero e crecemento di mas grandi tawata e turistanan cu ta bin for di Venezuela. Si no tawata tin un crecemento asina nos turismo apenas lo a registra un crecemento minimo. E propio minister di turismo y tambe ATA a reconoce e trend nobo den turismo aki y ta diferente reunion a wordo yama tanto pa ATA y tambe pa e commission fiho di turismo den parlamento pa atende cu e trend nobo aki. Gran mayoria di turistanan cu ta bin for di Venezuela no ta bin Aruba pa keda na hotelnan, no ta cumpra productonan turistico y ta bin Aruba pa cambia dollars.

Anja 2016 a habri sumanente malo pa e sector hotelero. Normalmente e luna di januari lo mester ta un di e mihor lunanan di anja y ta den pleno high season. Lamnetablemente e anja aki no ta e caso y tin varios hotel riba e high rise strip cu tawata corre den occupacionan rond di 50%. Di e 15 hotelnan cu tin na Aruba, 14 di nan a conoce un grado di occupacion mas abou den luna di januari 2016 compara cu januari 2016..

Luna di januari 2016 ta sera cu un grado di occupacion di apenas 78.2% y esaki tawata un caida di 6.7% compara cu januari 2015. Esaki ta un golpi hopi fuerte pa e sector hotelero pasobra normalmente durante e temporada halto aki e placa ta wordo genera cu lo yuda hotelnan absorba e golpi di low season. Hopi ta e hotelnan cu e experiencia e luna di januari 2016 como un low season. E cifranan ta papia pa nan mes. Banda di esaki REV PAR cu ta un indicador hopi importante y ta bisa ki clase di turista ta bin nos pais tambe a conoce un caida drastico. E REV PAR na luna di januari 2016 tawata $234.15 y esaki a conoce un caida dramatico di 9.9%.  Mientras e minister di turismo a pone como meta pa REV PAR crece cu 9% net contrario ta pasando. Un minister ta wordo huzga pa e metanan cu e ta pone su dilanti y tambe pa wak si e la logra esakinan.

Hotelnan tawata ofrece specialnan y tawata ofrece camber na un prijs reduci pa asina por yena nan cambernan. Nos ta lamenta cu nos turismo ta pasando den momentonan asina aki. Nunca antes luna di januari a habri asina malo cu un grado di occupacion asina abou y cu un REV PAR asina abao. E indicadornan aki ta duna di conoce cu sector hotelero no lo tin un anja facil. Nos ta spera cu minister di turismo actua mesora riba e desaroyo aki y cu e lunanan cu ta nos dilanti conoce un mehoracion. Otmar Oduber mester atende cu e crisis aki awor pa evita cu nos bolbe haya un anja malo den nos turismo. Aki bow cada ken por wak e cifranan di e sector hotelero durante luna di januari 2016 compara cu januari 2015.

Expresionnan haci den e articulo aki no necesariamente ta refleha opinion di ArenaPoliti.co