Chris Romero (MEP): Si bo no tin un salubridad publico bon e lo pone peso extra riba fondonan di AZV
Algun siman atras Minister di Educacion a bin Parlamento pa presenta e proyecto scolnan saludabel cual meta principal ta mehora prestacion di alumnonan y siñanan come saludabel. Apesar cu e idea ta uno bon, no ta kita afor cu e lo trece gastonan cun’e cu no por wordo paga. Actualmente prijs di fruta y berdura ta asina caro cu bo no por cumpranan, sin lubida cu hopi mayor ta cobra salario minimo. E problema principal no ta solamente prijsnan halto sino e control cu mester wordo haci riba e productonan. Realidad ta cu awendia pa cumindanan saludabel bo ta paga hopi mas placa cu esnan cu no ta saludabel. Den pasado, pa purba minimalisa e efecto, gobierno di MEP a elimina invoerrechten riba fruta y berdura pa asina e prijsnan por baha. Pero e prijsnan a bay halto atrobe pasobra no tin control. Ademas e hecho ta cu mester hinca fruta y berdura den e canasta basico, cual sigur lo ta un di nos prioridad. Consecuencianan di no come saludabel tin hopi hende na Aruba cu entre otro presion halto, cholesterol halto, diabetico, personanan cu problema di curason, obesidad y hasta awendia tin hobennan ya caba ta tumando dialyse. Esaki ta inaceptabel! E no por ta asina cu Prome Minister ta biaha tur caminda y ta papia di sostenibilidad siendo cu na Aruba mes e no ta duna contenido na esaki. Ora bo ta papia di sostenibilidad bo tin di haber cu ecologia, proyectonan social, enseñansa y un pueblo saludabel. Si bo no tin un salubridad publico bon e lo pone peso extra riba fondonan di AZV. Si nos sigui den e forma aki, sigur gobierno lo sigui aumenta e prima di AZV mas ainda..
Expresionnan haci den e articulo aki no necesariamente ta refleha opinion di ArenaPoliti.co