Den su despacho Prome Minister Mike Eman a ricibi mr.B.J. Swagerman y mr. J.W.E. Storm van ‘s Gravezande. Banda di ta miembro di Eerste Kamer di Hulanda Swagerman ta tambe Vice President di Servicio di Seguridad di KLM. Storm van ’s Gravezande a traha hopi aña cu KLM y awor ta un consultant riba tereno di aviacion y Vice Presidente di Bonaire International Airport NV (BIA). Nan bishita cerca Eman tabata primeramente como representante di e compania ey. Tambe a toca e tema di Pre-Clearance y Happy Flow.

Swagerman a bisa cu e combersacion cu Eman a bay hopi bon. “Como representante di Bonaire International Airport NV nos kier yuda den formalisa e desaroyonan cu tin. Nos a constata cu e islanan ABC den e region Caribense mester sigui den coherencia cu otro. Un di e temanan cu nos a papia riba dje ta con promove turismo riba e islanan Aruba, Boneiro y Corsou. Pa haci esaki hunto pa asina e economianan di e islanan por sigui crece. Den e contexto ey nos a papia riba e topico Pre-Clereance pa Aruba y e Happy Flow”. Pa loke ta e topiconan interesante aki Swagerman a bisa cu Pre-Clereance y Happy Flow mester haya nan forma den un cooperacion publico/priva. Schiphol, KLM y Aruba como iniciador ta envolvi den e proyecto aki, pero tambe Ministerio di Siguridad y Husticia di Hulanda y Ministrio di Finanza ya cu aduana ta bay hunga un rol grandi den e proceso aki.

“Aruba tin caba su Pre-Clereance Mericano y mescos cu pa esey a implementa un parti Mericano aki, lo mester haci cu Europa. Hulanda riba su mes no por dicidi pa translada su controlnan di frontera pa Aruba. Esey mester sosode cu permiso di Comision Europeo. Eman y tur e miembronan di e stuurgroep ta trahando duro pa logra esaki pa asina secretario di estado Teeven bay cu e mision aki na Europa. Nos tin entendi cu Teeven ta sostene e proyecto aki completamente.”

Pa loke ta ‘Happy Flow’ Swagerman a splica cu esey tambe ta un topico cu a wordo discuti cu Prome Minister. E parti di ‘Happy Flow’ cu ta encera cu e forma di procesa pasaheronan ta bay mas lihe, haciendo uso di biometria, ta bay start dentro di algun luna.

Storm van ‘s Gravezande a amplia un poco mas riba e desaroyonan na e aeropuerto di Boneiro. “Hunto cu e stuurgroep nos ta wak unda Bonaire airport or hunga un rol den e desaroyo di aviacion y turismo den e region Caribense. Aki nos ta referi tambe na Aruba y Corsou pa wak pa haci’e interesante.” Storm van ‘s Gravezande ta mira cu Pre-Clereance y Happy Flow ta pas den e contexto aki pa e turistanan di y pa Europa.

Ambos funcionario ta di opinion cu Aruba, Boneiro y Corsou por complimenta otro door di ofrece un pakete na turistanan Europeo. Turistanan cu ta haya sumamente interesante pa bishita e islanan. Asina nan por haya e oportunidad pa bin Aruba pa e beachnan bunita, bishita Corsou pa su historia cultural y Boneiro pa su trankilidad y naturaleza. “Cada isla riba su mes tin su caracteristica specifico y e idea ta pa mira e islanan ABC como un hub turistico. Cada aeropuerto tin su balor adicional pa e economia di e isla. E islanan por fortifica otro di e forma aki. ” 

Expresionnan haci den e articulo aki no necesariamente ta refleha opinion di ArenaPoliti.co