Parlamento a trata e presupuesto di enseñanza pa 2017, y den nomber di MEP, Evelyn Wever-Croes a expresa e deseo ferviente den comunidad pa introduci enseñansa liber. Especialmente mirando con caro tur cos a bira na Aruba, famianan mester di alivio. 

“Den e programa di MEP enseñansa lo haya prioridad pa MEP. Y p’esey mester percura pa tur mucha tin oportunidad igual na enseñansa. 

Un di e formanan pa logra esey ta haciendo enseñansa liber pa tur mucha. Pasobra enseñansa liber ta permiti tur mucha e mesun oportunidad den enseñansa. 
Contrario na e filosofia y maneho di partido AVP cu a haci enseñansa mas caro cu nunca. Schoolgeld y collegegeld a aumenta pa schoolnan basico, scolnan secundario y estudionan avansa.
Pa bo manda bo yiu EPI of Colegio Arubano ta practicamente full un salario di minimumloon bo mester paga y esey ta haci cu hopi hoben no ta sigui studia. Esey nos kier evita. 

Den mi bishitanan den casnan mi ta topa cu hobennan cu tin hopi potencial pa studia, pero cu mester a stop di studia pasobra nan mayornan no por carga tur e gastonan. Pesey ta duel nos cu gobierno di Mike Eman ta haci’e cada biaha mas dificil pa nos muchanan studia. 
MEP a presenta un mocion den Parlamento dia 1 di april 2015 cu a haya sosten di tur miembro di Parlamento. Den e mocion gobierno a duna Minister Hooijboer-Winklaar instruccion pa haci estudionan necesario pa introduci enseñansa gratis pa tur mucha. Awor nos ta 19 luna mas leu nos ta ripara cu e minister no a haci net nada. Peor ainda pasobra e gobierno aki ta haciendo enseñansa cada biaha mas caro! 

Ta obvio cu e gobierno aki no ta interesa den enseñansa di nos muchanan. Mike Eman kier desaroya Aruba den un ‘kenniseconomie’ riba nivel avansa, pero no ta inverti den enseñansa basico. Minister Michelle Hooijboer kier pa tur studiante bay studia na Canada, pero no ta inverti den enseñansa basico.

Minister Hooijboer ta yegando na final di su periodo como minister, y lamentablemente lo no wordo recorda como un minister cu realmente a logra algo pa enseñansa. Esaki ta di lamenta, pasobra nos muchanan ta nos futuro, y inverti den nan educacion mester ta prioridad di tur gobierno”, Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co