Xiomara Maduro: IMF ta puntra si Pueblo di Aruba ta conciente di con malo e situacion financiero di nos Pais ta
E siman aki nos a reuni cu e ehecutivonan di IMF kendenan a bin pa evalua e situacion financiero y economico di nos Pais. IMF su pregunta mas principal tabata si Pueblo di Aruba ta conciente di con malo e situacion financiero di nos Pais ta. Nos a contesta nan cu no ta tur hende ta realisa kiko ta pasando na nos Pais.
Nos a splicanan cu algun hende ta compronde locual IMF, FITCH y Standard and Poors’ y CFT ta bisa nos y sa cu cos no ta bon. Algun persona a ripara cu algo no ta bon na momento cu nan a mira Prome Minister Eman bay welga di hamber bou palo. Otronan a realisa cu cos no ta bon, ya cu nan ta sintie den nan cartera cu a keda afecta pa medidanan di Gabinete Eman. Tin un grupo grandi cu ta lucha pa sobrevivi y no tin tempo pa pensa si cos ta bayendo bon of malo. Pero tin un grupo tambe cu ta confundi. E grupo aki ta wordo malinforma pa algun medio di comunicacion cu no ta bisa e berdad di e situacion y pesey no ta realisa e gravedad di e situacion financiero. Tambe e hecho cu tin algun sindicato y gremio cu no ta reclama hopi of no ta subi caya pa manifesta, pa un grupo ta señal cu tur cos ta bayendo bon. Y mas cu claro bo tin un grupo cu ainda ta kere e noticianan positivo cu e Ministernan di Gabinete Eman y e parlamentarionan di AVP ta trece dilanti yena cu manipulacion di e berdad.
E pregunta aki di IMF ta basta remarcabel y ta mustra cu nan tambe ta mira cu Gabinete Eman no ta bisando e berdad na e Pueblo di Aruba riba e situacion financiero di nos Pais. Esaki ta di spera, ya cu IMF tambe a experencia con Gabinete Eman a sconde nan rapport di 2013 pa e no wordo publica promer cu eleccion na september 2013. Ta danki na e insistencia di opocicion di MEP, e rapport di IMF di 2013 a bira conoci. Banda di esaki, ainda nos ta corda con Gabinete Eman y su exponentenan tabata bagatalisa e recomendacionnan y preocupacionnan cu IMF a trece dilanti, bisando cu IMF ta djies duna conseho y si sigi nan nos Pais su economia lo wordo dania mescos cu IMF a dania economia di Argentina y Venezuela. Un manipulacion cu partido AVP a usa pa asina Pueblo cay den e trampa cu tur cos ta bon y cu no tin ningun MEGADEBE na nos Pais.
Diabierna awor IMF lo emiti un raportahe preliminario di su evaluacion di Aruba y aki dos luna lo publica e rapport final cu nan bista riba e situacion financiero y economico di nos Pais.
11 februari 2015
Expresionnan haci den e articulo aki no necesariamente ta refleha opinion di ArenaPoliti.co