Angel Bermudez: Detayenan di Reforma Fiscal lo wordo presenta pa Prof. Vermeend
ORANJESTAD - Minister di Finanzas, Angel Bermudez a confirma cu Profesor Vermeend a yega Aruba ayera nochi pa asina presenta den e dianan venidero e plan completo di e reforma fiscal na Gobierno, Parlamento y demas instancianan. Esaki ta inclui su conseho definitivo di con e leynan di impuesto lo wordo modernisa y simplifica den e dos añanan venidero.
Segun e mandatario di finanzas, sigur e plan no ta pa introduci ningun impuesto nobo pa e aña aki sin embargo si tin algun ahustacion como parti di e reforma cu lo por wordo ehecuta di trempan pa simplifica di e leynan, esaki lo por wordo implementa ainda pa 2015.
“Mi ta kere mas bien e reformanan di mas grandi lo ta pa 1 Januari 2016 y 1 Januari 2017. Mi ta masha ansioso pa e presentacion aunke mi tin un idea mas o menos di kico pa spera ya cu mi ta mantene comunicacion regularmente cu Profesor Vermeend”, Minister Bermudez a expresa.
Prof. Willem Vermeend lo splica exactamente con e efectonan di e reforma lo ta, kico lo haci pa cuminsa simplifica y modernisa henter e composicion di leynan di impuesto di Aruba, con esaki lo bay sostene henter e desaroyo economico di Aruba y tambe di con e lo ta sostene henter e maneho cu Gobierno tin pa yega na un finanzas publico sostenibel.
E no ta un secreto cu un di e retonan di mas grandi pa Minister Bermudez ta e reforma di e totalidad di e leynan di belasting y despues di algun bishita di Prof. Vermeend na Aruba cu varios reunion entre diferente gremionan concerni, e comision bou di liderazgo di Sr. Vermeend a finalisa e conseho pa loke ta trata e reforma fiscal y den e dianan venidero esaki lo ta conoci entre e diferente gremionan.
Expresionnan haci den e articulo aki no necesariamente ta refleha opinion di ArenaPoliti.co