Ki orguyoso nos ta ora cu nos por celebra nos dia di Himno y Bandera. Aruba lanta mainta hisa bo bandera na laira y mustra cu gran orguyo cu bo ta un ARUBIANO.

Un isla di apenas 180 Km² di grandura y 109+ mil habitante ta haci nos un isla asina chikito compara cu otro paisanan rond di mundo. Pero cu virtudes asina grandi cu ta haci nos igual na otro paisnan. Aruba semper a boga pa igualdad tanto den crecemento economico, su bunitesa te cu su palabranan captivante di su himno. Ta facil pa cualkier pais bisa cu nan ta un pais stabil compara cu Aruba. Pero un cos ta di nos , Aruba sa di sorprende mundo henter cu su perseverancia continuo y su hendenan amabel. No tin ningun reto cu nos no por logra.

Den añanan 80 e economia tabata florese cu un rafeneria cu tabata genera no solamente placa pa e isla pero tambe empleo, turismo, comercio etc. Tabatin vacatura cu mester a emplea personanan di otro pais pa bin yuda den nos cresemento. E personanan aki a percura pa traha duro y a contribui na un Aruba nobo sin exepcion algun. Un turismo cu a crece di un dia pa otro. Negoshinan cu tabata habri manera paddestoel. Medida tabata un palabra desconoci. Aruba su estado financiero y gubernamental tabata un di e miho den caribe cu un economia sumamente stabil. Awe, 34 aña despues di nos Status Aparte por mira cu nos a perde e rafeneria simultaneamente cu hopi desempleo door di e cierre di Valero. Nos unico pilar economico restante cu ta turismo, ta demasiado fragil. Siguramente esaki no tabata e pensamento di nos politiconan di antes pa mira e mal decisionan cu a wordo tuma awe. Mi ta sigur cu nan tin dolor pa mira e situacion con e a bira. E situacion a bai asina subtil y esnan cu a forma parti den e firmamento di nos Status Aparte na 1981 ta puntra nan mes dicon, kiko of na unda a bai robes!  

Claro nos Arubiano no ta hende pa sinta wak nos orguyo wordo plasta y mas cu claro nos tur hunto kier solucion pa cu e situacion financiero. Mas bien nos mester refleciona riba e dia di awe cu nos por miho y nos merece miho desde awor pa dilanti. Aruba kier mira cambio y cambio Aruba mester haya. E reflecion mester ta cu: mester bini politiconan nobo, jong y dinamico pa e Aruba nobo. Naturalmente nos tur kier mira e Aruba di antes pero mas cu claro den un bachi nobo. E cambio por wordo haci cu boso ayudo pasobra abo tin e jabi den bo man.   

Y cu e pensamento aki, ami, Maisa Faro di Democracia Real kier a desea tur Arubiano y esnan cu no ta naci pero ta sinti’e Arubiano di curazon, un felis dia nacional. Biba Aruba, biba nos hendenan y biba nos Himno y Bandera.

Expresionnan haci den e articulo aki no necesariamente ta refleha opinion di ArenaPoliti.co