Manera ta conoci Gabinete Eman pa medio di su balanced budget akkoord (BBA) kier trata na yega na un surplus na aña 2018. Esaki ta encera un plafond di gastonan di 1.350 biyon y un base di entrada 1.150 miyon pa aña. Remarcabel di e plan aki ta e hecho cu e no ta wordo considera como un “norma financiero concreto”. E acuerdo aki a wordo firma door di e propio ministernan mes di e gabinete na 2013 y te cu awe e ta obvio cu e disciplina propio no tey. Es mas ta bon pa recorda como un ehempel cu e propio Gabinete Eman no a cumpli cu e acuerdo na 2014 pasobra a gasta 252 miyon mas cu loke a presupuesta. Contrario na Aruba islanan ruman Corsow y Sint Maarten si conoce un norma financiero concreto cu ta ankra den ley y mara na condicionan (por ehempel ora di hasi prestamo). Logicamente esaki ta crea un structura ora di maneha finansas publico y cu e ta obligatorio pa cumpli cu e ley.

E norma aki ta encera cu e cuenta coriente di e pais mester ta balansa. Mester enfatisa cu den principio un cuenta coriente balansa ta ser considera como e regla di oro den finansas publico. Esaki ta nifica cu gastonan coriente por ehempel gastonan di consumo di gobierno lo mester wordo paga cu entradanan coriente por ehempel placa di belasting. Den e charla teni na Universidad di Aruba CFT a splica e logica tras di e regla aki. Hecho ta si bo presta pa gastonan actual bo debe lo aumente cada aña y na dado momento lo no tin limite. Un ehempel concreto cu a wordo duna ta cu Gabinete Eman riba un base repititivo ta presta pa por paga salarionan di aparato gubernamental.

E organo di supervision a compara e situacion aki cu un scenario domestico. A splica cu ora famianan hasi prestamo pa inversionnan manera un cas ta pasobra e ta un inversion pa termino largo. Automaticamente e ta nifica cu bo lo ta e propietario y door di esaki bo ta spaar placa cu bo lo no ta pagando pa huur. Loke ta wordo gespaar den e caso aki ta bai na paga interes y capital presta. Imaginabo un scenario cu un famia cuminsa presta pa su compras di cada dia esaki lo conduci nan problemanan financiero serio. Cada dia e hasi e gastonan aki lo nifica cu e famia tin cu presta placa. Ora cu yega asina leu lo no tin placa gespaar tampoco placa pa paga e interes ni tampoco capital di e prestamonan hasi.

Den caso di Gabinete Eman desde cu e la tuma mandato e no conoce kiko ta disciplina. E gobierno di Eman 1) semper a gasta placa cu no tin, 2) no tin disciplina presupuestario, 3) no a cumpli cu leynan di comptabilidad y por ultimo 4) no a mantene nan mes na propio acuerdo (BBA). Hecho ta cu cifranan conoci ta papia un idioma cla y raspa con irresponsabel nos finansas publico a wordo maneha.

Si nos hasi un flashback na 2013 e relato di Raad van advies a indica cu ankramento di e "balanced budget akkoord" lo no ta suficiente pa garantisa un maneho financiero sostenibel y mirando con e ta bayendo awor e ta haya su rason. E realidad ta cu tanten no tin sancion un gobierno cu mayoria por sigi haci y deshaci. Loke si Raad van advies a conseha ta implementa un prohibicion pa cera prestamonan ora cu e presupuesto no ta cumpliendo cu normanan segun ley. Esaki ta algo similar na loke Corsow y Sint Maarten conoce. Den nan caso e cuenta coriente mester ta balansa pa por hasi prestamo cu interesnan faborabel. Logicamente esaki nunca Gabinete Eman mes no a considera pasobra e mes a viola y desvia di tanto ley scirbi y propio acuerdonan. Pero loke Gabinete Eman no hasi pa falta di responsabilidad otro ta hasi. Akinan ta unda Gabinete Eman ta wordo frena pasobra a acerca Rijksministerraad (gobierno di Reino) pa haya aprobacion pa por bay haci un prestamo den exterior y e unico manera pa haya esaki ta cu aprobacion di CFT. Cual a laga sa di kier mira mehoracion promer cu duna un evaluacion positivo. Loke bo por conclui di esaki ta cu si Gabinete Eman tawatin un norma financiero concreto y tawata responsabel den su maneho cosnan lo a bai diferente y no mester a pasa un caminda di cruz. Hecho ta cu bo no mester gasta mas di loke bo tin y ta pesei un norma manera di tin un cuenta coriente balansa mester wordo considera.

Expresionnan haci den e articulo aki no necesariamente ta refleha opinion di ArenaPoliti.co