Evelyn Wever-Croes (MEP): MEP no tin confiansa mas den maneho di Minister di enseñansa
Durante e reunion publico di diaranson ultimo e deficiencia den e maneho di Minister di Enseñansa a wordo confirma.
E ta un hecho cu ultimo tempo tin varios problema serio den Ministerio di Enseñansa entre otro cu SKOA, conflicto cu SMOA y recientemente problema di suspensión di un docente na Scol Primario Kudawecha.
Despues cu parlamento na varios ocasion a insisti pa yega na un solucion pa e problema di schoolgeld y pa un solucion mas rapido na scol primario di Kudawecha, Minister di Enseñansa a demostra un incapacidad y un falta di boluntad.
Pa colmo a resulta cu Minister di Enseñansa a malinforma parlamento, no a sigui proceduranan y reglanan rutinario relaciona cu castigonan disciplinario y no a sigui principionan di bon gobernacion. Fraccion di MEP ta lamenta cu e minister a bai over pa condena un docente sin cu a hasi un investigacion debido.
Basa riba e hechonan ariba menciona, incapacidad y falta di boluntad demostra door di Minister encarga cu Enseñansa y asuntonan di Famia, sra. Hooijboer-Winklaar fraccion MEP a entrega un mocion retirando confiansa den su maneho. Nos ta lamenta cu fraccion AVP a bira lomba y ignora e problemanan di enseñansa siendo cu nan sa cu cosnan ta birando peor y no tin cambio!
Expresionnan haci den e articulo aki no necesariamente ta refleha opinion di ArenaPoliti.co