Pasobra mester di 55 miyon MAS placa

ORANJESTAD – Lider di MEP Evelyn Wever-Croes durante conferencia di prensa di MEP a para keto na e anuncio di gobierno cu entrante otro anja lo bin cu un belasting nobo, e ABB di 6 pa 8%.

Segun e minister di finanzas, mester bin cu e belasting nobo aki, pasobra e “health tax” (BAZV) a trese hopi problema. “Logico cu e ta trese hopi problema. E ley ey nunca mester a bin. Minister Bermudez mes a bisa Parlamento cu e no ta di acuerdo cu e ley aki, pero debi na terquedad di Mike Eman, mester a bin cune. Ademas, tin un solucion masha facil: un cambio di ley sensiyo por caba cu tur e confusion. Pasobra si e problema ta cu mester cobra health tax riba BBO y BBO riba health tax, por djis cambia e ley y stipula cu ni BBO ni health tax ta parti di e omzet. Pero no mester bin suta pueblo cu un belasting nobo” segun lider di MEP.

Tambe ta wordo bisa cu e belasting nobo aki, ABB, lo re-emplasa varios otro belasting, entre otro invoerrechten. Riba esaki Evelyn Wever-Croes a bisa “actualmente den invoerrechten tin varios tarifa halto riba productonan di luho, pa esnan cu mas entrada por paga. Pero si bo elimina tur invoerrechten entre otro esunnan halto riba producto di luho, y pone henter pueblo paga 6 pa 8% di ABB, no ta husto. Pasobra atrobe esnan schouder smal mester bai paga pa esnan schouder hancho paga menos? Nos lo no acepta algo asina. Tanten cu no tin seguridad cual belastingnan ta bai wordo elimina, y con esaki ta afecta esnan cu schouder smal, nos no por sostene algo asina”.

“Bottom line ta cu e cambionan den belasting pa bai pa ABB mester duna gobierno 55 miyon extra otro anja, y e 55 miyon aki ta di pueblo kier bai cobr’e. Esaki ta para den e presupuesto di gobierno. Gobierno ta scohe pa cobra pueblo e 55 miyon aki, enbes di pone companianan grandi paga nan ‘fair share’, esaki ta un escohencia inhusto segun e lider di MEP.

“Pero locual mas ta sorprendemi ta con Mike Eman por wak su cara den spiel mainta. Den campanja el’a priminti cu e ta bai elimina BBO di 3%, y awor e ta mustra cu no ta bai elimina nada, sino awor kier cambi’e pa un di 6 pa 8%! Mike Eman mester tin hopi curashi di tuma hende hasi di e forma aki. Mike Eman mester admiti cu el’a enganja e pueblo di Aruba, e mester admiti cu el’a faya den su maneho financiero, anto e ora nos por papia”, lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co