Na papiamento nos tin un dicho ta bisa: “Porco sushi ta busca muraya blanco pa e frega su curpa na dje”  Esaki ta exactamente locual exponentenan di AVP kier haci culpando partido MEP cu Aruba lo ricibi un KB of AMvRB. Locual cu e exponentenan aki no ta realisa of kier accepta, cu e famoso "Samenwerkingsprotocol" ta Mike Eman y Piet Hein Donner a firme na aña 2011. E "Uitvoeringsprotocol" conoci awe den Pueblo como e "Acuerdo di Jueves Santo", ta Mike Eman y Ronald Plasterk a firme. Porcierto, e ultimo acuerdo aki ta prueba palpabel di e "Kiezersbedrog" cometi pa partido AVP durante eleccion na 2013. E golpi mas grandi pa pueblo di Aruba ta e carta di Februari 2014, den cual sr. Yrausquin, den su posicion di minister di finanzas, a acepta un control riba e finanzas publico di Aruba atravez di un instancia independiente. E palabranan "Geen Bezwaar" ta papia pa nan mes. Pues ningun exponente di AVP por bin bisa, cu ta pa motibo di partido MEP awe nos Pais tin un CFT ta bati na su porta. E realidad amargo ta, cu ta Gabinete Mike Eman mes a yama CFT "Bon Bini" na Aruba! 


Ta masha importante pa pone enfasis riba e carta cu CFT a publica relaciona cu e presupuesto 2015. E resultado di e carta ta, cu e presupuesto 2015 tin un total di 24 medida proponi pa Gabinete Eman II riba lomba di Pueblo! CFT ta di opinion cu ta dificil pa midi ki efecto e 24 medidanan lo tin pa cu e finanzas publico di Aruba riba termino largo (2015 - 2018). CFT ta haña cu e medidanan cu Gabinete Mike Eman kier bini cune, mester ta mucho mas concreto. Esaki pa motibo cu loke tin poni den Presupuesto 2015 no ta traduci sea den cifras, decisionan of sikiera intentonan concreto di ehecucion. Tin hasta cierto medidanan propone pa AVP, cu CFT ta considera obsoleto paso a tarda pa implementa nan. Bottom-Line ta pa es motibo aki, CFT ta keda para riba 4 punto concreto pa drecha e situacion financiero di nos Pais.


Cual sea e rumbo cu lo wordo tuma den 2015, na nomber di Fraccion di MEP, mi ta refuta energicamente cu ta nos tin algo di haber cu e binimento di CFT. Mucho menos cu ta nos tin algo di haber cu e medidanan cu lo wordo tuma den un futuro sercano. Ta sr. Mike Eman a bin ta maneha nos Pais di un forma descabeya for di 2009. Ta sr. Mike Eman a firma diferente protocol cu Hulanda cu e promesa di un maneho financiero mas responsabel. Ta un Minister di Gabinete Mike Eman II a manda carta di "Geen Bezwaar". Y ta AVP a incorpora 24 medida den e Presupuesto 2015. Nos Fraccion ta desaproba e actitud di cierto exponente di AVP di kier laba man awor di CFT y e medidanan na caminda, pasobra na final ta AVP mes a invita y yama CFT "Bon Bini" na Aruba!"

Expresionnan haci den e articulo aki no necesariamente ta refleha opinion di ArenaPoliti.co