Ministerio di Turismo: Cu atencion riba regulacion di All Inclusive y bienestar di economia y turismo di nos isla, Minister Otmar Oduber lo reuni dialuna cu Comisionnan Fiho di Turismo y Economia di Parlamento
Dialuna Minister Otmar Oduber lo ta reuniendo cu Comisionnan Fiho di Turismo y Economia di Parlamento pa trata e tema di All Inclusive na nos isla. Intecion di e reunion aki ta pa elabora riba regulacion di All Inclusive na Aruba, basa riba maneho di Minister di Turismo y tambe siguiendo e mocion presenta pa Parlamento di Aruba durante tratamento di Presupuesto 2015 luna pasa.
Minister Oduber a indica cu el lo presenta na e comisionnan Fiho di Turismo y Economia e cambionan di ley pa regulacion di All Inclusive, cual ta hopi avanza na e momentonan aki y si conta cu nan sosten ta spera cu e siman aki mes nan por wordo manda pa Raad van Advies.
Manera ta conoci, siman pasa caba Minister Otmar Oduber a anuncia cu leynan ta wordo adapta conforme cu e maneho cu Gobierno a anuncia recientemente. Esaki kiermen cu lo bin cu un tipo di vergunningstelsel pa loke ta trata operacion di all inclusive y cambernan cu ta wordo gehuur cu no ta solamente camber. Esaki ta encera cu no solamente ta bay reglamenta e aspecto di all inclusive, sino tambe fenomenonan manera adds-on y credit vouchers entre otro cu no ta conforme e turista conoci como ‘transient’ of EP visitor.
Tambe e mandatario di Turismo lo informa e comisionnan di Parlamento cu ya caba el a participa AHATA di un di dos decision cu Gobierno a tuma banda di e regulacion di e cambernan cu no ta EP/ Transient. Esaki ta cu lo cuminsa e proceso pa crea un impuesto adicional pa loke ta trata all inclusive cu lo conta no solamente pa hotelnan nobo, pero tambe pa hotelnan existente. Minister Oduber a compromete su mes cu AHATA cu den e proximo simannan lo sinta na mesa pa bay mas den detaye y negocia riba esaki, cual naturalmente tambe ta spera cu lo haya sosten di Parlamento.
Un di tres topico cu Minister Oduber lo discuti cu parlamentarionan dialuna ta e tema di e situacion di benta di Radisson y e decision di corte cu lo tuma lugar dia 17 di juni.
Minister Otmar Oduber ta sigur cu e reunion aki lo ta uno sumamente positivo unda cu lo prevalece e deseo pa salvaguardia futuro y bienestar di nos economia y nos turismo mirando cu nos isla ta depende un 90% riba turismo.
Expresionnan haci den e articulo aki no necesariamente ta refleha opinion di ArenaPoliti.co