Pa mas di 10 luna caba Aruba a wordo perhudica pa haya recibonan di coriente y awa cu sumanan reduci di mas cu 50%. Un decision tuma bou di Minister di Utilidad y e vision di Gabinete Eman a comete un crimen contra comunidad cu e aventura di hedging!

Den e 10 luna cu a pasa un famia cu por ehempel ta paga 300 florin pa luna lo tin awendia mas di 1500 florin den su poder. E famia cu ta paga 500 florin awe lo por tin mas di 2500 florin extra den su man pa gasta na necesidadnan di su famia. Ta di lamenta cu mundo completo a probecha di e bahada di prijs di crudo y na Aruba so nos no a haya ningun beneficio cu esaki. E caso aki ta grave pasobra nos pais a paga mas cu 100 miyon florin cu a wordo benta afor pasobra esaki a bay den exterior. E ta incomprendibel te ainda cu Minister de Meza y Prome Minister Eman no a asumi nan responsablidad pa e hedging mal efectua y a dicidi pa retira e director tumando e caminda facil. E manera cu a efectua hedging ta esun di mas pio pasobra ni si prijsnan lo a bira cero Aruba lo no conoce beneficio y tampoco e consumidor lo haya prijsnan mas barata di coriente y awa.

Nos tin entendi cu kizas por tin un rebaho riba recibo di awa na fin di aña. Si esaki resulta asina, e lo por ta un alivio mey mey di tur e medidanan. Realidad ta cu te ainda pueblo ta sufri cu prijsnan halto di utilidad algo cu sigur no ta su lugar.

Expresionnan haci den e articulo aki no necesariamente ta refleha opinion di ArenaPoliti.co