MEP: Corupcion den proyecto di hospital ta causa medida di health tax
ORANJESTAD – Fraccion di MEP pa dos anja caba ta hopi critico riba e proyecto di renobacion y expansion di Hospital, y a cuestiona esaki na varios ocasion. MEP a pidi reunion den Parlamento, pero e presidente di parlamento a warda e baca hoga, pa core yama e reunion. MEP a pidi e reunion na februari 2014, y apenas awor na september 2015 e reunion ta wordo yama pa finalisa. Mientras tanto ya e baca a hoga caba!
E corpucion den e proyecto aki a costa nos pueblo masha hopi mes. No lubida cu den e proyecto aki, pa privilegia amigonan a duna e proyecto na esun cu a bid mas halto, 40 miyon florin mas halto!
Pa por paga e 40 miyon extra ey na e amigo, na december 2014 gobierno a suta pueblo cu e medida cruel di HEALTH TAX, BAZV, cu luna pasa a subi te na 2%!
MEP kier a evita pueblo e dolor di e medida ey, y pesey MEP a pidi e reunion. MEP ta kere den alternativa, no den medida. Alternativa tabata pa NO firma e contract, sino duna e trabou na e otro compania cu a bid 40 miyon florin mas abou. Pero e gobierno di AVP a core firma contract y asina a mara nos yiunan y nan yiunan na otro debe monstruoso. Asina tambe, pa por cumpli cu e medidanan di CAFT, mester a bin cu e HEALTH TAX di 2%.
Y e hecho cu parlamento no a yama e reunion importante aki, ta hasi parlamento, of por lo menos, e mayoria di parlamento y e presidente di parlamento complice den e corupcion na Hospital. Bo no por yam’e otro. Ora un gobierno deliberadamente ta pone pueblo paga 40 miyon EXTRA pa un proyecto, djis pa privilegia un amigo, bo no por conclui otro cu ta corupcion!Y tur cu ta permiti e corupcion tuma lugar ta complice.
ESCANDALO DEN E PROYECTO AKI
E problema mas serio cu MEP tin cu e proyecto ta cu gobierno di AVP a bai den un destaho publico, mas dudoso cu hamas nos pais a yega di conoce! E casonan di fondo desaroyo San Nicolas, den cual Otmar Oduber, Henny Eman, Tico Croes y indudablemente Mike Eman a hunga un rol, a keda chikito banda di esaki. Aki gobierno a maniobra masha stranjo, no un biaha, no dos biaha, sino varios biaha.
Esakinan ta algún di e puntonan cuestionable:
1.Pa prome un compania cu a bid 40 miyon florin mas halto, a gana e bid, pa un total di 250 miyon.
2.Pa colmo no ta e compania cu a gana e bid, ta esun cu a entrega e bid, el’a entrege bou di otro nomber.
3.E proyecto ta costa 250 miyon, pero pueblo mester paga bek 900 miyon florin!
4.Riba dje e hospital aki NO ta brinda MAS capacidad, mes hopi cama ta keda existi. Pues e problema cu tin awor cu ta tarda pa bo wordo opgenomen pasobra hospital ta yen, e mesun problema lo sigi existi den futuro, maske nos yiunan y nan yiunan mester paga casi 900 miyon florin
5.E protecto mega caro aki, NO ta inclui salanan di operacion nobo!
Pa e motibonan aki fracción di MEP ta CONTRA e proyecto aki, y lo no descansa te ora bin un investigación imparcial pa determina ken mester wordo teni responsabel. E rol dudoso cu presidente di parlamento a hunga den tur esaki, pa trese asina tanto tardansa den e proyecto, tambe lo wordo investiga. Pueblo merece di sa e berdad. No ta husto pa bo pone pueblo paga 900 miyon florin pa un proyecto cu a costa 250 miyon florin, sin ningún splicacion
Expresionnan haci den e articulo aki no necesariamente ta refleha opinion di ArenaPoliti.co