Rene Herdé (AVP): Kita sosten politico na agresornan
Atentadonan, intimidacion, agresion y destruccion ta sosode cu sosten politico
DESTRUCCION
Den su declaracion Rene Herde a bolbe mustra cu e mes un hendenan cu a comete actonan di intimidacion, destruccion, agresion y violencia den pasado recien aki na Aruba, ta haciendo esey awor atrobe. Y den tur nan actonan, e hendenan aki a y ta haya sosten di e partido MEP y su lidernan. Ora a kima auto dilanti di Parlamento, ora a planea pa destrui edificio di Parlamento na september, ora a intimida Prome Minister di Aruba den su poco oranan liber y ora polis a sera hendenan cu a comete e actonan aki, e lidernan di MEP a sostene nan y a hasta yamanan heroenan.
ISOLA Y ELIMINA
Mientras cu partido AVP ta insisti pa nos tene nos mes na normanan di democrasia y respet pa tur hende, pa respeta organonan di nos pais manera corte di husticia y ministerio publico, e partido MEP ta sostene e gruponan di hende cu ta intimida, agredi, ofende, menasa y causa destruccion den nos pais. E unico forma pa elimina e tipo di violencia organisa aki ta door di kita tur sosten y isola nan den comunidad, te ora nan haci nan propio bida di agresion imposibel. Mester kita tur sosten pasobra nan ta contra tur cos bon cu nos pais ta para pe. Esun cu sostene nan agresion, intimidacion, menasa y destruccion, ta contra di Aruba!
Expresionnan haci den e articulo aki no necesariamente ta refleha opinion di ArenaPoliti.co