Scucha mi grito pero no mira mi actonan! 

AVP ta bay den historia como un partido manipulador: “Emanipulacion”. Ta fresco den nos memoria con Mike Eman y Mike de Meza constantemente a demonisa gobierno di MEP como cu MEP lo tabata usa placa di dividendo pa inverti bek den pais Aruba. Durante campaña tabata tin masha hopi grito y expresionnan popular di Mike Eman como promesa falso na e pueblo di Aruba . Manera “elimina BBO” of  e plan cu Mike tin pa combati y caba cu criminalidad. Tambe Mike & Mike a priminti masha hopi cu AVP lo tin no un pero dos presupuesto alternativa y NO lo mishi cu dividend di companianan estatal y lo laga esakinan intacto pa dicho companianan por sigui inverti.
Pueblo di Aruba, den e dianan aki cu cos ta cayente den Bestuurskantoor, nos postbus tambe ta yena cu documentonan y mester algun luna pa por caba di divulga tur cos. Adhunto por aprecia un documento como prueba con AVP desde su entrada den gobierno na 2010 a cuminsa chica companianan estatal. Ningun no a scapanan, ni tampoco Utilities N.V. Un total di 175 MIYON a wordo ranca di companianan estatal, esta Setar, Banco Central, Aruba Airport Authority, Aruba Tourism Authority y Utilities, unda mayoria a core den rood pa algun tempo. Mi ta reta Mike Eman of Mike de Meza pa bin dilanti y declara cu esaki no ta berdad.  Pues Mike y AVP ta manera e dicho: “Scucha mi grito pero no mira mi actonan”. Emanipulacion manipulando un pueblo! Pero mi tin e confiansa cu pueblo lo sa di castiga actonan di sinberguenseria y mentira di Mike y AVP di e taya aki cu nan unico arma esta cu nan pen den e proximo eleccion.  Bo por gaña algun hende algun dia pero bo no por gaña henter un pueblo pa semper.

Expresionnan haci den e articulo aki no necesariamente ta refleha opinion di ArenaPoliti.co