Tratamento di presupuesto 2016 a cuminsa, na unda parlamentarionan di AVP ta sali na defensa di nan hefenan den gobierno, enbes di atende debidamente cu nan deber pa controla gobierno. Manera ta custumber, a prefera di ataka personanan cu no ta den sala pa defende nan mes, y alabes e presidente a permiti nan referi na loke oradornan anterior a bisa den prome tanda, siendo nan ta den prome tanda ainda.
Pues parlamento y e presidente ta trapa reglanan y normanan.

Mas bochornoso tabata e actuacion di e flamante minister di salubridad.
Ya ta conoci cu e cobarde aki ta usa como su lema di gobernacion cu “aanval is de beste verdediging”.
E ta lansa atakenan infunda contra personanan y institutonan, pero sin menciona nomber. Den e caso aki mi ta referi na un declaracion den parlamento na unda e ta menciona e minister anterior encarga cu maneho di nos grandinan cu no a haci nada y tabata dictatorial.
E minister part-time, sin sa a ataka su propio miembro di partido y actual presidente di parlamento cu a atende cu e cartera aki pa 8 aña largo.

By the way, si ta mi persona e kiermen cu ta dictatorial, anto e lo mester ta agradecido p’esey, pasobra sino awor aki lo tabata tin un longarts hulandes enbes di su persona. Ta ami a para riba pa sr. Boesten nombra su persona pa bin eherce e funcion di longarts aki.
Y e lo ta den e "koude kikkerland" Hulanda, y e lo no por ta un "part-time" minister tampoco!!

Mas importante ta loke ta tumando lugar riba e tereno di salubridad.
A nombra un director cu no ta cumpli cu e condicionnan, como hefe di e departamento di salubridad.
A busca un compania priva pa institui un Inspectie di Salubridad na comienso di 2017.
Parce cu e gobierno aki tin un bari sin fondo pa complace amiguitonan, pasobra kiko e rol di e director nobo di salubridad ta anto? No ta e ta esun cu lo mester tin e experticio pa ehecuta un trabou asina?

Pa colmo - esey ta si en berdad e minister aki cumpli cu su palabra - a tarda 3 aña pa e minister realisa su prioridad number uno di e campaña electoral na 2013.
Mientras tanto e pashent Arubiano ta na merced di secrecia y tapamento di casonan di mediconan y nos ta experiencia un deterioro nunca bisto den e cuido pa henter nos pueblo.
Mi a tuma nota di un declaracion haci door di sr. Ringeling na NoticiaCla encuanto e fondonan ricibi di BAZV. Interesante ta cu AZV lo a ricibi tur suma, pero cu esaki ta menos di loke AZV a presupuesta pa 2015.
P’esey a presupuesta un suma mas conservativo pa 2016, y sr. Ringeling no kier a divulga di ki suma e ta papiando.

Loke ta resalta ta cu Banco Central den e Statistical News Release di 13 di januari 2016 ta menciona cu ningun transferencia a wordo haci pa AZV for di e fondo di BAZV.
Pakiko tanto secrecia, y por spera cu den e presupuesto supletorio di 2016 toch gobierno lo mester cubri parti di e gastonan di AZV cu nan no por a cubri cu e BAZV?
Esaki ta di spera pasobra e gastonan di AZV lo bay mustra un aumento a base di aumento di casonan crónico y e “vergrijzing” acelera cu CBS a pronostica ya un tempo atras.

Igualmente sr. Ringeling no por a duna mi persona un splicacion debido pakiko ainda e investigacion, cu por cierto a start casi 2 aña pasa, no ta cla ainda contra specialistanan cu supuestamente lo a comete actonan di malversacion na salanan di operacion di hospital.
Esey ta loke Ministerio Publico a laga ami sa por escrito.

Tampoco sr. Ringeling no por a duna un bon splicacion dicon no a entrega un keho formal cerca OM contra e medico cu a wordo gara na ImSan ta haci actonan coruptivo.
A caso tin husticia di clase aki na Aruba anto????
Poco poco mas casonan di fraude ta yegando na nos conocemento.
Parce cu en berdad kehonan den salubridad ta wordo hinca den doofpot.

Otro insulto peligroso di e minister di salubridad ta contra e laboratorionan na Aruba, cu segun e mandatario, ningun no lo tin un acreditacion debido, y ela insinua cu si acaso nan tine, anto e lo ta cumpra.
Un solo laboratorio a sali padilanti pa defende nan honor, pero te ainda mi no a ripara cu a puntra e minister un rectificacion publico, y si esey no sosode, anto lamentablemente mi ta yega na e conclusion cu “wie zwijgt stemt toe”.
Entrega un keho na OM y exigi rectificacion pa nos pueblo por tin e confiansa back den nos sistema di laboratorio!

Pa finalisa mi kier a haci mencion di un declaracion di e minister di salubridad, na unda den sala di parlamento a falta respet pa un parlamentario, pero tambe na tur esnan cu tin problema cu oido, ora cu e minister a insinua cu e parlamentario no ta scucha bon, y mihor e bay laga nan check esaki na FEPO.
E mesun minister aki cu a wordo menosprecia door di su hefe sr. Eman, ora un pashent cu a haña implantacion di un aparato special pa por scucha, a prefera di bay gradici sr. Eman y no su persona! Ni sikiera e minister a wordo invita pa ta presente.
A logra di habri un instituto medico na San Nicolas cu lo mester a mehora e cuido medico, principalmente cardio-vascular na Aruba en general y San Nicolas en particular.

Lamentablemente tur mi esfuersonan tabata envano, pasobra awor aki a deshaci di esaki pa capricho partidista, y te ainda ta priminti cu pronto lo bin cu tratamento di cancer na ImSan.
In the meantime ta keda paga Baptist di Miami pa nan servicionan.

UPP y mi persona semper a para pa un cuido medico di nivel, pero pagabel, na Aruba.
Nos a ehecuta plannan basa riba un "gezondheidsonderzoek" cu e minister di salubridad anterior sr. Posner a laga haci, y a bin cu un maneho integral pa mehora accesibilidad di a pashent pa cuido medico.
Lamentablemente despues di 6 aña di gobernacion actual, nos por a ripara un deterioro y un pueblo cu ta paga pa un servicio mediocre, y e minister (part-time) ta sigui menosprecia e lamento di e pueblo cu ta paga su salario y ta permitie pa e sigui traha como longarts.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 1, 2016

Expresionnan haci den e articulo aki no necesariamente ta refleha opinion di ArenaPoliti.co