MINISTER SIEVINGER TA METI DEN DEMASIADO ESCANDALO CU TA HOLE NA CORUPCION 

ORANJESTAD- E fraccion di mas grandi den oposicion den parlamento di Aruba a hasi entrega di un mocion di desconfiansa contra di e actual minister di Infrastructura Sevinger door cu e minister tawata envolvi den casonan cu publicidad negativo relaciona cu diferente caso cual nos lo resumi en corto den e comunicado aki. Lider di fraccion sra. Evelyn Wever-Croes a presenta e mocion y a argumenta kiko ta e motibo di e desconfiansa. El'a basa su mes riba 6 prueba cu a wordo presenta tambe:

TERENO NA ROBERTO RINCON
Riba 5 mei 2015 e minister a otorga na sr. Roberto Rincon un aprobacion pa expansion di tereno erfpacht mientras cu e persona en cuestion tawata bou investigacion caba di autoridadnan Mericano bou sospecha di corupcion y labamento di placa. Rincon mientrastanto a wordo deteni door di autoridadnan Mericano y e respuesta di minister den e caso aki e la laga sa cu e lo a “screen” Rincon via google y no a haya nada stranjo. Mester enfatisa cu e declaracion aki no ta cuadra cu berdad pasobra e tempo ey caba tawatin informacion negativo relaciona cu e persona aki y su relacion cu Hugo Carvajal.

INSTRUCCION NA IMIGRACION PA LAGA RINCON DRENTA ARUBA
Remarcabel den e asunto aki ta cu minister Sevinger algun tempo atras na 24 oktober 2014 a duna sin autorisacion instruccion na Imigracion pa laga Rincon drenta sin cu e tawata den posicion di e papelnan legal pa drenta Aruba. E temporada ey caba Rincon tawata bou investigacion.

TORNO CU BALOR DI PROPIEDAD
Recientemente a resulta cu e minister sin ningun tipo di splicacion a cambia balor di un tereno ora di otorgacion di tereno erfpacht pa un hotel. E departamento di gobierno a determina e balor di un tereno 1500 florin pa meter cuadra pa un tereno erfpacht cu un suma di erfpachtscanon di 144.000 florin pa aña. E minister sin substancia a baha e suma na 90 florin pa meter cuadra consecuentemente mester paga 9.120 florin na canon pa aña. En general e balor pa un tereno asina ta di 1500 florin pa meter cuadra.

VEREDICTO 13 JANUARI 2016
Den un veredicto di hues data 13 januari 2016 hues bati riba dedenan di e minister di Infrastructura despues cu e la viola leynan, proceduranan y consehonan di departamentonan di gobierno relaciona cu e cambio di un propiedad di un cas pa un hotel. Esnan cu ta habita den e barrio a lanta un caso despues cu e minister en cuestion a pone su firma y aprobacion “dezerzijds akkoord” pa por construi un hotel. Hues a condena e accion aki y cu e firma di e minister no tin balor.

VEREDICTO 21 JANUARI 2016
Den un otro veredicto data 21 januari 2016 hues a bolbe ripiti cu Minister Sevinger a actua contra regla door di a cambia destinacion di un tereno pa vivienda pa uso commercial. Segun e hues e procedura corecto no a wordo cana. Basa riba esaki hues a laga sa bon cla cu gobierno concientemente a mishi cu derecho di estado y frustra husticia. Y cu e accion aki a perhudica y corta na estado di derecho.

VEREDICTO DI 29 MEI 2013
Ademas di esnan menciona caba a resulta for di un otro veredicto di 29 mei 2013 cu hues un biaha mas ta bati riba dede di e minister y cu e tempo ey caba e lo a attach nos estado di derecho.E tempo ey hues a puntra su mes caba ta ki tipo di vision gobierno aki lo tin, si nan ta corta na estado di derecho manera cu ta nada.

Basa riba e hechonan aki y declaracionan hasi door di e propio minister, su comportacion y accionan nos fraccion ta di opinion cu e no por sigui como minister. Den cuadro di esaki nos a entrega un mocion di desconfiansa.

Expresionnan haci den e articulo aki no necesariamente ta refleha opinion di ArenaPoliti.co