Evelyn Wever-Croes na Mike Eman: Si bo kier cuestiona mi integridad wak den spiel prome
Durante e debate den Parlamento e siman aki, lider di MEP Evelyn Wever-Croes a manda un palabra fuerte den direccion di Mike Eman, den cual Evelyn a urgi Mike Eman pa asumi su responsabilidad y no desvia atencion.
“Nos pais ta pasando den momentonan hopi difícil, y na e momentonan aki e lidernan di nos pais mester ta sincero cu pueblo. No mester desvia atencion y hiba otro tipo di discusionnan . Aki mi ta referi na tur e cortina di huma cu Mike Eman ta gusta usa.
Pesey mi a bisa Mike Eman, si e kier cuestiona mi integridad, wak den spiel prome, pasobra ami no a fia 1.8 miyon for di Interbank y keda sin paga. Si e kier usa informacion di banco cu a wordo horta, lesa e veredicto un biaha mas, pasobra un hues imparcial a dicta cu no tin ningún caso di cosnan dudoso. E prome minister cu ta un hurista mester por comprende e veredicto masha bon. Y si en caso, e no ta di acuerdo cu e veredicto, bai Ministerio Publico y entrega keho. Stop di yora y lamenta, y bai entrega keho, y si e tin miedo, mi mes por tene su man hib”e entrega keho. Y finalmente, en bes di lastra hendenan cu no ta den Parlamento pa defende nan mes, hasi mesun cos, bai ministerio publico y entrega keho, en bes di lamenta y cansa hende.Pero e no por bai ministerio publico nunca, pasobra e no tin ningún prueba. Pesey no ta keda nada otro cu stop di papia coi loco, y stop di desvia atención. E pueblo aki merece miho: no wordo manipula ni desvia. E pueblo merese di sa unda nos ta bai, den 5 anja bo a redobla e debe y lo tarda 26 anja esey ta e realidad cu nos ta bibando aden: den cual anja nos ta lanta cabes.
Mi mensahe pa Mike Eman ta cu si bo kier debati riba liderasgo y credibilidad, djis lagami sa ki dia y na unda, y mi lo t’ey; mientras tanto carga bo responsabilidad y stop di masacra e pueblo aki.
Expresionnan haci den e articulo aki no necesariamente ta refleha opinion di ArenaPoliti.co