Durante presupuesto 2016 atrobe Minister Eman y e exponentenan  di AVP kier desvia atencion di e mal maneho financiero di Gabinete Eman door di bay papia riba e 8 aña di gobernacion di Gabinete Oduber bisando cu a yega haya un desastre financiero na unda cu e presupuestonan tabata conoce un deficit structural di 9.4%. Esaki ta nada mas cu mentira di Minister Eman cu ta keda desenmascara pa cifranan di Banco Central. Loke si ta berdad ta cu e mal maneho di Gabinete Eman ta locual a percura pa deficitnan nunca antes bisto na nos Pais.

Estadistica Anual di Banco Central ta desenmascara Eman
Minister Eman por wel di purba na manipula e Pueblo aki cu su mentiranan riba e situacion financiero, pero e cifranan di e Annual Statistical Digest di Banco Central ta desenmascara tur mentira di Minister Eman. Si bo pasa por ehempel den e rapport aki di estadistica anual di Banco Central pa 2014 bo por mira cu tempo di Gabinete Oduber nos Pais a conoce deficitnan cu tabata core den 0.8%, 2,1 %, 8,9%, 3%, 2.8%, 1.5%,3,6% y na dos ocacion hasta a conoce surplus di 4.8% y 1%. Na 2004 na momento cu Gabinete Oduber mester a stort placa den e fondo di APFA pa por a drecha e desaster di Gabinete Henny Eman, ta e unico momento cu e deficit a yega na 8,9%. E cifranan di deficit di Gabinete Eman ta mustra full un otro patronchi na unda bo ta haya 4.4% na 2010, 7.1% na 2011, 9,8% na 2012 y 7,2% na 2013 y 8,5% na 2014. Anto tene na cuenta cu na 2010 Gabinete Eman a haya mas di 200 miyon di placa di BBO di Valero, pero asina mes tabata tin un deficit di 4.4% cu ta equivalente na 188,6 miyon florin conforme e informacion presenta pa Banco Central.

Cifra di deficit nunca antes bisto
Banda di e informacion di estadistica di Banco Central, ta bon pa nos corda cu na 2011 caba e Presidente di Banco Central den e “Economic and Financial Developments Report 2011,” a señala cu nos ta registrando cifra di deficit y debe nunca antes bisto na nos Pais. Y desde 2011 nos por wak cu e deficit no a baha mas y a keda subi mas y mas na 2012, 2013 y 2014. Anto asina mes cu Gabinete Eman a presenta un plan na 2010 pa baha deficit tur aña cu 75 miyon, asina mes e deficit a keda subi mustrando cifranan nunca antes bisto na nos Pais.

Manipulacion y mentira no ta yuda
Pesey ora Minister Eman bisa cu ela hereda un desaster financiero, esaki ta un simpel mentira y cifra di Banco Central ta comproba esaki. Ta di lamenta cu nos Prome Minister no ta realisa cu tanto manipulacion y mentira no ta yuda y ta sirbi djies pa bruha tera strobando nos Pueblo di progresa.


16 februari 2016

Expresionnan haci den e articulo aki no necesariamente ta refleha opinion di ArenaPoliti.co