‘mester di investigacion factibel y plan di accion efectivo’ 

Secreto: Keto keto, ‘manera ladron den anochi’, Minister di Enseñansa ta pasa tur scol basico y anuncia cu e ta elimina e fenomeno di keda sinta den e prome aña. E ta haci esaki pasobra Parlamentario Rene ‘wanta e loco ey’ Herde ta grita cu esaki ta costa Aruba hopi placa. No tin un estudio factibel haci na e causa, pero si tin un solucion ‘a la paracetamol’.
Inversion: Enseñansa den tur faceta ta un inversion y absolutamente no ta un gasto. Pone placa di pueblo disponibel pa nos muchanan. Inversion den nos futuro generacion ta un condicion ‘sine qua non’, pues un condicion absolutamente necesario!!
Keda sinta: Keda sinta kiermen cu e mucha no a logra e meta stipula di e klas. Na Juli 2015 Inspeccion di Enseñansa a publica e porcentahe di mucha cu ta keda sinta den klas 1 te cu 6 (scol basico) di añanan escolar 2009/2010 pa 2013/2014. E analisis cu ta sigui ta basa riba e promedio di e añanan escolar menciona.

Analisis: Un promedio di 15% di mucha (mas o menos 200 mucha) ta keda sinta den klas 1 cada aña. Esaki ta baha cu 5% den e di dos aña, te na 10%. Den e di tres aña di scol basico e ta bira te hasta 7%. Den e di cuater aña di scol basico e ta subi cu 2% bek, te na 9%. Pa 5de klas e ta baha bek na 7%. Y den e ultimo klas di scol basico e porcentahe ta baha formal te na 2%.
Influencia: Inspeccion ta indica y ami ta conclui cu e causa, p’e mucha haci e mesun klas di nobo, por ta relata na: (A) aspecto social-emocional di e mucha mes, (B) aspecto pedagogico-didactico di e maestro/maestra y/of  (C) aspectonan deficiente di e proceso di enseñansa. Minister no a haci ningun investigacion pa sa cua intervencion mester.
CBS: ‘Centraal Bureau voor de Statsitiek’ (rapport eindtoets basisonderwijs 2008, CBS) ta uza un modelo global cu ta duna un bista riba e parametronan cu ta influencia prestacion di un mucha. E parametronan aki ta categorisa den dos factor; 1. factor interno di scol y 2. factor externo di scol.
Factor interno: Parametronan di e factor interno ta e (a) curiculo, (b) facilidad, (c) nivel di maestro/maestra, (d) absentismo maestro/maestra y (e) ambiente na scol.
Factor externo: E factor externo ta reparti entre factor personal di e mucha y factor di famia. Entre nan dos (personal y famia) tin 22 paramentro cu ta influencia su prestacion. Factornan personal ta entre otro, presion di grupo, salud, y motivacion. Factornan di famia ta entre otro, cuido despues di scol, constelacion familiar y idioma cu ta wordo papia na cas.
Preparacion: Mester evalua si e muchanan preparacion den scol primario ta suficiente pa por tin exito den klas 1 di scol basico. Ki influencia e cambio di idioma den scol primario (Papiamento) pa scol basico (Hulandes) tin?
Locura: Minister di Enseñansa y Famia ta tuma un decision sin pia sin cabez. Esaki no ta maneho pero locura. Locura cu ta causa mas daño na e sistema di enseñansa y na e mucha. Locura cu ta riba grito di un parlamentario ‘loco’.
Solucion: 1. Haci un investigacion factibel na e factornan cu tin influencia riba prestacion di e mucha. 2. Bin cu plan di accion efectivo pa soluciona e problema. (3) Inventarisa na cada scol e facilidadnan cu tin pa sostene e proceso di enseñansa y pone nan ‘in place’ y funcional. (4) A termino corto implementa articulo 9 inciso 1 di e Ordenansa Nacional di Enseñansa Basico. Laga tur scol uza Papiamento como idioma di instrucccion den klas 1 y 2, y sostene e maestro/maestra cu material na Papiamento. (5) Parlamento mester yama Minister pa responsabilisa su decision descabeya y bis’e pa stop cu locura!!!

Expresionnan haci den e articulo aki no necesariamente ta refleha opinion di ArenaPoliti.co