MEP: Sr. Baba Herde a kibra regla di etica y fatsoen
Baba Herde a bolbe comete un blunder grandi, e biaha aki cu e rapport di Raad van Advies. Sr. Herde a demostra un biaha mas cu e fraccion berde y e gobierno ta dos man riba un barica, y cu e fraccion di AVP no ta traha pa controla gobierno, sino mas bien ta solamente defende gobierno
Un rapport di Raad van Advies ta un documento secreto y ta wordo publica solamente despues cu Gobierno mes reacciona riba dje. Sr. Baba Herde cu un trayectoria asina largo den politica tabata sa esaki masha bon, pero a bolbe scohe e caminda di busca confrontacion cu Gobernador.
Sr. Herde a referi na e rapport di Raad van Advies cu e si a ricibi y e si por a studia, prome cu demas miembronan di parlamento a ricibi’e. E mester a abstene su mes di hasi esey. Pasobra ainda Gobierno mester a duna su reaccion, pero sr. Herde a wordo apunta pa manda e mensahe cla y raspa pa Hulanda con AVP ta mira e situacion, y de paso a haya necesario pa bolbe tira lodo contra Gobernador. Un acto masha bergonsoso.
Ta bon pa sr. Herde realisa cu Raad vanAdvies ta bisa cu e gobierno aki su maneho financiero NO ta sirbi, y cu e rapport di CFT ta valido. Kiermeen, ni cuanto sr. Herde ataca Gobernador, e rapport di CFT a pone berdadnan riba mesa cu sr. Herde y henter partido AVP kier a sconde: nos debe nacional a wordo redobla den 5 anja, y lo tarda 26 anja pa recupera di e desgracia aki.
Expresionnan haci den e articulo aki no necesariamente ta refleha opinion di ArenaPoliti.co