ORANJESTAD – E fin di siman cu a pasa a haya luz berde pa proyecto Green Corridor. Despues di un proceso largo di preparacion, e proyecto ta bira un realidad. Districtonan pariba di brug ta haya un avenida mucho mas amplio, pero tambe cu enfoke riba siguridad den trafico y calidad di bida.

Green Corridor ta un avenida di cuater via pa San Nicolas cu pa  decadanan a papia riba dje. Gobiernonan a bay y gobiernonan a bin, hopi plan, pero nunca tabata tin e boluntad pa ehecucion. Green Corridor ta inclui tambe  embeyecemento impresionante di e areanan di Sero di Mahuma pa Pos Chikito, Savaneta, Cura Cabay, Mabon, Brazil, Zeewijk te den Centro di San Nicolas. Green Corridor ta inclui un ‘fietspad’ acopla na ‘Linear Park’ di Playa te San Nicolas.

Minister di Infrastructura di Gabinete Mike Eman II, Sr. Benny Sevinger, a firma e acuerdonan pa ehecusion final di e siman cu a pasa y dentro di poco ta spera cu e proyecto ta cuminsa.

Green Corridor ta un di e cuater proyectonan cu pa decadanan largo tabata papia riba dje, pero cu nunca tabata tin e boluntad pa ehecuta nan. Aunke cu nan ta esencial pa desaroyo di Pais Aruba semper nan a keda riba mesa. Gabinete Mike Eman I y II a ehecuta nan tur, entre otro proyectonan ta Waf nobo di Carga na Barcadera, Renobacion y ampliacion di dr. Horacio Oduber Hospital.

Na momento cu a drenta den Gobierno, Gabinete Mike Eman I a haya un situacion economico precario. No tabatin crecemento economico; al contrario, Aruba tabatin un caida economico di 5%. “Esey kier men cu bo pais no ta bayendo dilanti y e oportunidad pa bo hendenan haya extra entrada no tabatey,” Minister Sevinger a splica despues di a duna e luz berde pa comienso di Green Corridor. “Nos a haya un situacion cu un inflacion caminda Florin a bay atras cu 22%, mundo tabata den un crisis, pero Aruba dobel dor di e efectonan cu refineria a cera. Esey tabata e start di e gobierno aki.”

Segun e Minister, ta masha facil pa oposicion bisa awor cu mester a tuma medida, pero esey no tabata e posicion adecua. Gabinete Mike Eman I y awo II a wak cu tabatin un necesidad pa stimula nos economia, y den esey, a haci un plan di tur proyecto cu por tin un influencia ria nos economia riba termino corto.

“Rapidamente pone hendenan na trabou, construccion a cuminsa, a busca fondonan di FDA, a stimula trabou mehorando producto Aruba, a drecha Caya Grandi, drecha San Nicolas y barionan. Asina a stimula trabou y crea entrada. “Un bes cu tin entrada, hendenan tin oportunidad di haci compras y asina entrada di gobierno ta crece. Esey tabata e meta grandi,” e titular di Infrastructura a splica.

Den e meta ey a haya cuater proyecto cu bou di tur gobierno tabata un debate. Un a haci mas cu e otro na dje, pero nada concreto a bin dilanti. “Bo no por keda debati, pero no bin cu un solucion,” e mandatario ta di opinion. Green Corridor ta un di nan hunto cu Watty Vos Boulevard, Expansion di Hospital y Waf Nobo. “Dia cu Hospital a wordo traha, mescos cu e caminda pa San Nicolas, ta tempo cu Aruba tabatin 50 mil habitante; awe nos ta un poblacion di 110 mil hende, dus casi dobel. Kier men bo no por keda cu e mesun infrastructura, Minister Sevinger a bisa.”

“Durante ultimo cinco aña a bin ta traha. Cada proyecto tin su reto, mas cu claro; algun mas grandi cu otro, pero sea chikito of grandi pero ta soluciona nan. Si wak cuanto proyecto a realisa y cuanto mas tin riba lista, bo tin cu bisa cu pais Aruba tin un diferencia grandi entre 2009 ora cu a drenta gobierno; un diferencia entre e pais cu a haya y uno cu ta preparando su mes fuertemente pa futuro,” asina Minister Sevinger a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co