Despues di a reuni cu PDVSA na Caracas mas di un luna pasá, a keda como conclusion di e reunion ey cu mester convence e sector politico na Venezuela pa nan duna nan apoyo pa PDVSA por procede cu e projecto di REAPERTURA di e REFINERIA DI ARUBA.

Esey a conduci cu mi a bolbe a haci un viaje pa Venezuela pa mi por cuminsa reuni pa convence e sector politico pa nan apoyo pa e lucha pa rescata nos di dos pilar economico y patrimonio di nos Pueblo esta e refineria.

E reunion a tuma lugar cu diferente figura politico prominente y di influencia pa nan oido y apoyo pa clamor di nos Pueblo pa habri e refineria bek. Mi mester expresa cu gran satisfaccion cu mi ta sinti un gran boluntad pa apoya e causa di nos Pueblo pa nos logra e reapertura di e refineria di Aruba.

Tambe mi a reuni cu un representante di Gobierno Venezolano Sr. Calixto Ortega Vice Canciller pa Europa alavez un conocido amigo di mi Tata. Tambe mi a pidie pa transmiti e mensahe di nos Pueblo na Gobierno di Venezuela en particular na Cuidadano Presidente di Venezuela Sr. Nicolas Maduro Moros di e solicitud pa e apoyo y solidaridad di Gobierno di Venezuela pa nos Digno Pueblo di Aruba.

Nos ta cautelosamente optimista paso ainda e trabao no a cla pero: NOS TA YEGANDO SERCA PA LOGRA E REAPERTURA DI E REFINIERIA DI ARUBA CU PDVSA. No ta tur ora cu oportunidadnan verdadero asina ta presenta nan mes, pero laga nos gradici nos Todopoderoso cu nos por ta yegando asina leu y pa sigi ilumina nos esfuerzonan pa finalisa e trabao.

Pa nos di MEP no ta importa cu lo toca e Gobierno di AVP haci e acuerdonan oficial di Gobierno cu Gobierno pa cu PDVSA y e Refineria di Aruba, pa nos di MEP ta importante logra e meta: HABRI E REFINERIA DI NOS PUEBLO…ANHELO VERDADERO DI NOS TUR. Mi ta realisa cu e hecho cu nos ta yegando serca ta haci cu e enemigonan di e reapertura ta sapateando pero akinan interes di nos Pueblo mester prevalece riba interes di nan propio saco.

Glenbert F. Croes
Miembro di Parlamento
Fracion di MEP

Expresionnan haci den e articulo aki no necesariamente ta refleha opinion di ArenaPoliti.co