Aña escolar 2014/2015 a yega na su fin sin cu tawatin un solucion relaciona cu overgangsnormen di studiantenan di MAVO cu kier sigui pa HAVO. Obviamente e Minister di Enseñansa a laga di desea pasobra e problematica aki ta andando pa basta tempo caba. E minister en cuestion no a haci lo suficiente pero si a opta pa traha un ley kitando tur autoridad di directivanan di scol unda cu e mes lo por bay dicidi cual studiantenan di MAVO lo por bay drenta HAVO.

E directivanan di scolnan di MAVO obviamente no ta mucho contento, pasobra ademas di a kita autoridad a pone nan un banda caminda cu nan no tin mucho mas di bisa pa cu maneho di scol. Ultimo biaha nos a urgi e minister pa forma un comision pa trata e problematica aki pero lamentablemente esaki no a sosode.

Un otro problema cu no a haya su atencion debido ta e introduccion di e extra vak na HAVO y VWO. Si esaki no sosode den e aña escolar nobo, nos studiantenan sigur lo bay haya nan mes confronta cu problemanan, ora nan lo kier sigui cu un estudio superior na Hulanda. Remarcabel ta cu problema aki lo mester trece mas cambio cune pa e alumnonan cu termina MAVO. Esaki ta nifica cu e normanan lo mester bay wordo ahusta atrobe. Nos ta spera cu e minister ta na altura di esakinan y tuma e debido accion.

Pa loke ta trata proyectonan, nos no a tende cu tin intencion pa bay construi e scol di HAVO/VWO na Noord pa por alivia e fluho di studiantenan, pero si a aproba diferente otro proyectonan caba. Esaki ta loke nos ta yama falta di prioridad. Nos pregunta ta, acaso esaki no ta importante pa pais Aruba y nos comunidad? Que hubo di nos hobennan cu mester wordo acomoda pa por sigui nan estudio? Realidad ta cu falta solamente 3 siman prome cu e aña escolar nobo cuminsa sin cu e accionnan necesario a tuma lugar!

Expresionnan haci den e articulo aki no necesariamente ta refleha opinion di ArenaPoliti.co