25 aña sirbiendo pais Aruba… 

ORANJESTAD - Minister di Finanzas, Angel Bermudez y Director di Departamento di Aduana Sr. Roderick Croes a haci entrega diaranson atardi di 8 decreto na miembronan di Departamento di Aduana cu a celebra 25 aña den servicio.

E grupo aki a drenta den servicio dia 16 di Maart 1990, un grupo cu Director Croes mes a forma parti di dje y ta conta tambe cu a pasa den un procedura di seleccion hopi riguroso 25 aña pasa, “Awe nos por mira e fruto di e proceso aki, cu ta coleganan ehemplar y cu rango halto den Cuerpo di Aduana”, Sr. Croes a indica.

Segun Minister Bermudez esaki ta un grupo basta intacto ainda pues 70% di e miembronan di e grupo ainda ta forma parti di Departamento di Aduana, “Mi ta sumamente orguyoso di e miembronan aki y cu hopi respet tambe mi ta extende un palabra di felicitacion pa nan tur cu nan 25 aña sirbiendo pais Aruba”, asina e mandatario a expresa diaranson ultimo.

Manera ta conoci caba, desde aña pasa cu Minister Bermudez a asumi e cargo di Minister di Finanzas, ya caba tabata tin hopi retraso riba tereno di e posicionnan legal di e empleadonan di Gobierno, pues e mandatario ta hopi satisfecho cu e logra keda cla cu e decretonan e aña aki ainda. “Nos a traha duro pa trece tur esaki bek den realidad paso mi ta haya como doño di trabou loke sigur nos di Gobierno mester ofrece ta e respet y atencion pa nos empleadonan. Pues na momento cu presenta un fecha cu mester celebra of conmemora mester haci esaki na tempo y no cu un retraso largo asina”, Minister Bermudez a afirma.

Na mes momento, Director Croes a sigura cu conhuntamente Minister Bermudez y e ekipo di maneho e trabounan ta continua  pa yega na e vision di e departamento, esta un departamento di Aduana moderno den su totalidad, pues no solamente cu edificio y ekipo nobo pero tambe unda cu por sigui eleva e nivel di nos duaneronan mediante diferente curso den tereno di ’verificatie”, “administratief controle” como tambe algun curso di integridad pa e coleganan di Aduana.

Minister Bermudez, Director Roderick Croes y henter e ekipo di maneho ta extende un palabra di felicitacion na Gwendelyn Boekhoudt, Ricardo Croes, Gregory Illidge, Earl Orman, Francis Perez, Guillermo Ruiz, Siomaira Schwengle-Maduro y Roderick Wouters cu nan 25 aña den servicio den Departamento di Aduana di Aruba.

Expresionnan haci den e articulo aki no necesariamente ta refleha opinion di ArenaPoliti.co