ORANJESTAD – Prome Minister di Aruba Mike Eman y President di Parlamento di Aruba Sra. Marisol Lopez-Tromp a invita gremionan pa reuni dialuna relaciona cu sucedidonan di e siman cu a pasa. Un di e gremionan cu tabata presente tabata AHATA cu ta representa e sector turistico na Aruba. Jim Hepple, director di Aruba Hotel and Tourism Association, a cataloga e reunion como uno hopi constructivo.

“Nos tabata al tanto di e historia di e fiscal council, e negociacionnan y con nos a yega na e punto aki,” director di AHATA a splica. “Nos tabata tin basta conocemento di e tema pa motibo cu nos tabata parti di Dialogo Social cu a tuma luga na 2013 y parti di 2014.” Sr. Hepple a splica si cu “nos a probecha pa haci preguntanan mas amplio, e implicacionnan y con ta sigui dilanti. Y pesey e tabata un reunion hopi constructivo.”

Como representantenan di sector turistico, e asociacion ta hopi preocupa cu loke a pasa siman pasa. “Loke a pasa siman pasa ta extremadamente inafortuna y e tabata obviamente un minoria di individuonan cu ta politicamente motiva. Papiando den nomber di e comunidad turistico, mi kiermen, 90% di Aruba su economia ta depende di turismo y claramente esey por ta exitoso unicamente si nos tin un percepcion positivo pa otro paisnan, pasobra turista no ta bay bin un destinacion caminda nan ta sinti insigur. Asina ta cualke cos cu ta menasa e percepcion ey, ta un menasa pa stabilidad economico di Aruba y di su ciudadanonan.”

Sr. Hepple a enfatisa cu ta hopi importante pa, como comunidad, nos tur acepta cu nos tur ta parti di e industria turistico, “nos tin di zorg pa e traha. No tin mucho cos mas cu ta genera entrada na Aruba. Pesey nos mester tin hopi cuidou cu e percepcion cu nos pais tin den exterior.”

Director di AHATA a splica cu te awor nan no a haya keho for di mercado Norte Americano, pero si for di esun Europeo. Un caso en particular a tuma luga na Aruba mes y cu a causa hopi preocupacion den seno di AHATA. “E siman cu a pasa un ‘Meeting Planner’ grandi tabata na Aruba pa book un serie di convencion na balor di mei miyon dollar y e persona aki a bisa e hotel cu, mi a kere boso a bisa'mi cu Aruba ta safe.” Esaki por tabata algo excepcional, pero nos mester realisa cu e tipo di hendenan aki ta constantemente na Aruba pa analisa si Aruba ta vale la pena pa trece turista of book convencionnan grandi cu ta trece un cantidad grandi di participantenan riba nos isla, segun Sr. Hepple.

Expresionnan haci den e articulo aki no necesariamente ta refleha opinion di ArenaPoliti.co