Gobernador na Parlamento di Aruba

Paisnan grandi y chikito rond di mundo a haya nan ta hisa nan gastonan durante di e crisis financiero y economico, pa limita of compensa e daño cu e crisis tabata causa na nan economia, mercado laboral y finansa priva y publico. Hasta paisnan cu tradicionalmente ta fuerte a tuma desicionnan cu a hisa nan deficit riba presupuesto y nan debe nacional. Hulanda mes ta un pais cu a wak su deficit surpasa e norma di Europa y a bay te mas o menos 5% den apenas algun aña. E dede nacional a subi den algun aña te yega 70% di nan GDP. Paisnan manera Hulanda a adopta e ora e maneho di "austeridad" den sector publico pa reduci nan deficit riba presupuesto mas lihe posibel y asina cuminsa baha nan debe nacional. Un di e retonan mas grandi di paisnan cu a adopta e maneho rigido di "austeridad" ta, pa baha gastonan publico sin afecta nan crecemento economico of causa problemanan social grandi. Esaki ta un reto masha dificil pa logra, pasobra di e rol grandi cu gasto y inversionnan publico tin den economia. E maneho di "austeridad" a causa den hopi pais, mescos cu na Hulanda, un stagnacion den crecemento economico. Despues di ocho aña di maneho di "austeridad" apenas awor economia di Hulanda a cuminsa pasa riba 1.5% di crecemento. Ainda leu di unda e tabata prome cu e crisis.



ARUBA
Gobernador sr. Refunjol a bisa durante di su discurso na apertura di aña parlamentario entre otro esaki:" Cu e fin di yega na finansa publico sostenibel den un tempo relativamente cortico - sin causa desbalansenan economico, laboral y social - Gobierno a sigui tuma e pasonan necesario pa yega na e punto di Presupuestonan Balansa." Cu otro palabra: gobierno di Aruba, sosteni pa fraccion di AVP den Parlamento di Aruba, a fiha como meta pa sali for di e tripel-crisis cu Aruba a pasa aden sin stroba crecemento economico, creasion di cupo di trabao y sin crea problemanan social nobo o grandi. Masha poco pais na mundo a logra esaki. Ni nos "madre patria" Hulanda a logra e meta aki. Aruba sinembargo a mustra resultadonan impresionante. Desde 2009. E deficit riba presupuesto ta yega 2% otro aña for di e punto mas halto di 9.4% di dos aña pasa, ora a caba di salba y sigura e fondonan di pensioen pa hopi aña. Den e periodo di 2009 pa 2015 e desempleo a baha di 12% pa 7.5%, creando trabou pa hopi hende. Pero realidad ta cu ainda falta. Economia cu a cay te -15% (negativo) na 2009 a subi bek na 2.7 % (positivo) y awe ta alrededor di 2% den apenas 5 aña. Kier men cu e maneho cu gobierno di AVP a hiba, a percura pa e deficit sigui baha, sin stroba economia di crece y crea mas trabou. Den e mes un periodo salarionan den sector publico y di enseñansa a crece cu 6000 florin pa aña. Pensionadonan a mantene nan forsa di compra cu e "reparatietoeslag" cu gobierno a introduci. Mescos ta conta pa e trahadornan den sector priva cu un salario te 2500 florin, cu tambe a haya e reparatietoeslag for di caha di gobierno. Esaki ta e forma cu gobierno di AVP y fraccion di AVP a enfrenta e reto grandi cu sr. Gobernador a referi na dje. Aruba atrobe ta den e grupo di paisnan cu ta haci cosnan diferente y logra su metanan den forma sobresaliente! Pero nos no ta cla. Ainda falta! Den e añanan cu ta bin ta sigui cu e maneho aki. Na mes un momento e inversionnan grandi den wafnan nobo, hospital nobo, infrastructura di "Green Coridor" y "Avenida Watty Vos" y den enbeyecemento di nos pais, ta crea mas oportunidad economico y reforsa e crecemento economico. Esaki ta e caminda padilanti!

Expresionnan haci den e articulo aki no necesariamente ta refleha opinion di ArenaPoliti.co