Den un declaracion haci na NoticiaCla e mandatario Schwengle a bisa cu diabierna awor Hospital mester bin duna cuenta na Parlamento.
Di unda ta sali cu un minister ta dicidi kende ta bin den Parlamento y kende no??
Lo tabata mas apropia, si e minister ta di opinion cu tin hende den e Raad van Bestuur actual cu a faya, pa actua contra esnan responsabel, y despues bin Parlamento pa duna cuenta.
Atrobe e minister ta duna muestra di un falta di conocimento di e reglanan, pa no papia mes di su falta di capacidad pa ehecuta un maneho debido pa mehora e cuido medico na Aruba.
Nos constitucion te ainda ta determina cu e minister ta esun cu mester duna cuenta na Parlamento y ningun otro hende, y no manera e kier pretende di por haci, esta laga un NO-politico bin den sala di parlamento pa duna cuenta. Esaki ta inaceptabel y intolerabel.

Remarcabel ta tambe e hecho cu e minister mes ta declara cu ela tarda asina hopi pasobra tabata tin un bay bin di carta.
Ta ki falta di respet esey ta pa un mandatario?
Esaki ta proba cu e minister aki no sa kiko e ta haci of ta otro ta bise kiko pa haci of laga di haci. Y den varios articulo nos a mustra caba cu e minister aki ta manera un mucha manda di Mike Eman. Y aki un biaha mas esaki a ser comproba.

Loke mas ta straña nos ta e hecho cu den un reunion di Parlamento na februari e aña aki, a suspende un reunion riba e topico di e cambernan di operacion pa dos siman. Y e dia ey e minister en cuestion a bisa cu no por tarda paso no tin tempo pa perde. Wel, ata nos cu e realidad: ta te despues di 8 luna porfin e minister tin un contesta.
Tempo cu e.o. ABV a pidi pa para e proyecto pa haci un investigacion den henter e procedura di otorgamento na e grupo mafioso di Miami, e minister a hera come e presidente di ABV bibo.
Pero awor pa motibo di su mediocridad y falta di determinacion, e asunto di camber di operacion a tarda mas di 8 luna.
Y pa colmo, en bez di carga su propio responsabilidad, e kier bin schuif esaki den scochi di otro. Y pa colmo sin menciona nomber.
E pregunta grandi ta dicon?? Miedo di kiko e tin?
Si e cartanan cu e tin den su poder cu segun e, ta mustra kendenan ta e culpabel, dicon no ta menciona nomber? Of mihor ainda, dicon no ta publica e cartanan aki?
Y sigur sigur den e cartanan aki ta menciona nombernan di esnan cu tabata den e Raad van Toezicht y den e Raad van Bestuur. Ta ki miedo tin di publica e nombernan? Ta na cua miembronan e ta referi? Boesten, de Kool of Falconi? Ta pakiko ta defende nan? Pueblo mester sa ta kendenan ta esnan culpabel di esaki.
Of e miembronan aki, for di PROME cu a firma e contract cu e mafiosonan di Miami, a notifica TUR e stakeholdernan di e situacion??

E minister lo por hura dilanti un huez cu e NO tabata na altura di e situacion? E ta dispuesto pa bisa esey den corte? Mi ta desea di topanan den corte pa bin cu prueba cu TUR esnan involvi a ser poni na altura di e situacion di e OK-nan for di augustus 2013, esaki prome cu Schwengle a postula su mes como candidato riba e lista berde y cu e promesa den su saco di lo a bira e siguiente minister encarga cu salubridad.
Pero tambe e minister a wordo debidamente informa na mei 2014, despues cu na Miami e compania hulandes Bussman a duna un presentacion na Bermello y na unda tabata presente AIB, SOGA y hospital.
Schwengle tabata forma parti di e staf medico di hospital, pero tambe como representante di e specialistanan den servicio di HOH e lo mester a wordo informa di e problemanan cu a surgi cu e salanan di operacion.
Remarcabel den e caso aki ta e rol di Frensel Giel y John Hodgson. A firma na april 2014, pues 8 luna despues di a wordo informa riba e estado di e salanan di operacion, cu Bermello, SIN cu un solo palabra a wordo dedica na e problema aki.
Ta p’esey nos di UPP ta exigi di e minister pa por lo menos menciona nomber di esnan cu E ta acusa di ta e culpabelnan pa asina nan por sali defende nan mes.
Pero conociendo e minister aki, su master's voice lo prohibiele di haci esaki.

Den e mesun declaracion e minister ta bisa cu e hecho aki lo bay costa hopi mas.
Cuanto mas?
Of miho bisa cuanto mas cu loke Bussman a propone? Paso no lubida cu e presentacion cu Bussman a duna na Miami, tabata cu prijs y tur cos. Y e minister sa esey y e miembronan di SOGA tambe sa esey y gobierno sa esey.
Of atrobe ta previlegia e mafiosonan di Miami?
Tur esakinan por wheel & deal gracias na e involvimento di esnan den SOGA cu placa di esnan cu ta paga nan prima tur luna na APFA. Na unda e sindicatonan ta kedando??
Ta di spera cu ta bin cu un investigacion forensico riba henter e asunto aki.
Y ta di spera cu un fraccion di parlamento cumpli cu e peticion di Candelario Wever, pa bin cu un investigacion similar riba e proyecto di Dump y di IMSAN. Ya pueblo mes por huzga! Si no tin nada di sconde, por fabor laga haci un investigacion forensico riba tur 3 proyecto.

Y by the way, con a sigui cu e investigacion riba e supuesto malversacionnan cometi door di algun specialista laborando den OK?
Y con nos mester compronde e posicion cu e minister actual tin cu hospital? E ta di un banda minister cu mester controla hospital pa garantisa un bon cuido na e pueblo, y di otro banda e ta cay bou di e Raad van Bestuur di hospital como specialista trahando na hospital.
Mi ta sigur cu e minister lo bay hustifica e conflicto di interes aki, indicando cu e a tuma e reto pa haci dos trabou, pa asina e mes por controla di paden e servicio cu hospital ta brinda.
Ta p‘esey UPP ta exigi di e minister involvi pa menciona nomber di esnan cu e ta acusando di ta culpabel. Of e no ta bay menciona nomber, pasobra e sa cu ora nan bay defende nan mes, nan lo por bin cu emails, cartanan, notulen, etc. etc, pa proba cu en todo caso Eman, Visser, Giel, Hodgson y full e Infra-team tabata na altura??

Den e declaracion e mesun minister aki kier bin pretende cu no por pone esnan culpabel responsabel. Dicon no??
Of kier laga nan GET-AWAY, pa nan no bay papia pa di e manera ey, e y su amo Mike Eman, tambe GET-AWAY?? Of aki atrobe e ley di Omerta di e mafiosonan ta conta?


Den nomber di Union Patriotico Progresista – U.P.P.
Candelario A. S. D. Wever
Brazil, september 17, 2015

Expresionnan haci den e articulo aki no necesariamente ta refleha opinion di ArenaPoliti.co