Recientemente parlamento a trata cambionan den e ley di inkomstenbelasting. E adaptacion di e ley aki a encera entre otro e aumento di e bijzonder tarief di 15% pa 25% y tambe eliminacion di correccion di inflacion. Den principio e tarifa special (bijzonder tarief) aki proponi door di MEP na aña 2012 (tempo cu Valero a cera) tawata special pa alivia trahadornan cu a perde nan trabou. E beneficio pa esnan retira tawata cu ora di ricibi nan pakete nan tawatin bini cu 10% mas "nettovergoeding" den nan man pasobra lo a retene esaki menos na belasting. Pa loke ta trata e parti di eliminacion di correccion a base di inflacion den e tabelnan di inkomstenbelasting esaki tawata encera cu cada biaha e aña sera cu un inflacion registra door di CBS e Minister di Finanzas lo a adapta e cobransa di loon y inkomstenbelasting conforme un factor cu ta baha e suma di belasting cu mester wordo paga. De facto e parti di e ley aki ta influencia e poder di compra di e trahador.

Cu e cambionan hasi y aproba door di 13 parlamentarionan di fraccion di AVP e tarifa special a wordo aumenta bek na 25% y correcion den tabelnan di inkomstenbelasting a base di inflacion no ta tuma lugar mas. Ta di lamenta cu e argumentonan treci padilanti no tawata convincente. Dus e decision no por a wordo hustifica! Remarcabel ta cu e Minister di finansas a declara cu lo no tin "retironan massal" mas y no ta wak e motibo pakiko mester continua cune. Siendo cu e esencia di e tarifa special aki ta netamente pa duna un alivio na e persona cu a caba di perde su trabou door di no cobre hopi belasting. Ironico ta e hecho cu mientras e Minister di finansas a declara cu e tarifa special aki lo no ta util mas un centenares di persona dia tras dia ta perdiendo trabou. E realidad ta cu nos economia no ta den su "drive" y esaki ta di nota na e solo hecho cu tur dia bo ta tende noticia cu mama y tatanan di famia a perde nan trabou.

Nos di oposicion tin comprencion pa e situacion dificil cu e comunidad ta pasando aden y netamente pesei fraccion di MEP no por a sostene tal decision pa aumenta e tarifa bek na 25%! Tampoco pa elimina e correcion di inflacion! Fraccion di MEP semper ta comprometi y constantemente ta sondea posibilidadnan pa alivia e cuidadano den tur aspecto fiscalmente. Un ehempel recien ta cu durante e reunion di presupuesto 2014 nos fraccion a presenta un mocion pa ahusta e "belasting vrij bedrag" di 20.252 pa 30.000 florin cual a ricibi sosten total. Nos fraccion a anticipa cu pueblo lo bay confronta su mes cu diferente aumento di belasting y un lista di otro medidanan cu lo hasie mas dificil pa ciudadano. Pesei nos di oposicion ta condena y lamenta e hecho cu a dicidi di aumenta e bijzonder tarief y no ta tene cuenta cu e poder di compra di cuidadano. Nos kier pa pueblo sa cu nos ta comprometi pa cambia esaki bek manera cu e tawata!

Expresionnan haci den e articulo aki no necesariamente ta refleha opinion di ArenaPoliti.co