Cu den conflicto y confrontacion 

"Den dialogo entre gobierno, doño di trabao y sindicato, a logra mas pa nos pais, pa doñonan di trabao y en especial pa trahadornan y nan famia. E ultimo seis aña ta e preuba mas cla di esaki. Si compara loke nos na Aruba a logra hunto den dialogo den e ultimo seis aña, compara cu e ocho añanan prome bou di gobierno di MEP, bo ta wak e balor di dialogo enbez di confrontacion y imposicion di e kier di gobierno riba pueblo." Esaki ta un di e puntonan cu Rene Herde', lider di fraccion di AVP a presenta enfaticamente ayera y a documenta esaki cu preuba. E punto di e necesidad di dialogo enbez di confrontacion a bini dilanti den e reunion di e fraccion di AVP cu FTA e siman aki.

DIALOGO vs CONFRONTACION
E motibo cu e punto aki a wordo poni riba mesa den e reunion entre AVP y FTA, ta cu den e dialogo tripartiete riba asuntonan laboral, hopi diferente tema a bini dilanti di e diferente gremionan, cu e meta pa mehora mercado laboral, pa aumenta productividad, pa mehora condicionnan di trabaou y pa baha desempleo. Den dialogo ta usa argumento, cifra y analysis pa combense otro di bentaha y desbentahanan, di bon y malo di tur idea of proposicion. Den e caso di e idea pa elimina articulo 1613x tabata tin hopi amenasa, insulto y intimidacion pa forsa hende pa accepta un punto di bista. Hasta a acusa miembronan di parlamento - cu no ta den e dialogo y - cu no a wak nada di e idea aki pa sikiera nan pensa riba dje, con a ta na fabor di e idea. E forma di traha cu menasa, insulto y intimidacion ya a daña politica na Aruba. Den otro paisnan a sosode mescos. Fraccion di AVP a pidi FTA pa no laga esaki sosode den e dialogo di partnernan social. E mes un mensahe lo duna otro gremionan den e dialogo laboral. Segun E fraccion di AVP, e dialogo ta un situacion di tuma y haya. Niun hende ta haya tur loke e kier, pero na final nos tur, henter Aruba ta sali gana.

RESULTADO DI DIALOGO
Segun Rene Herde' e preuba di esaki ta cu a logra mas pa Aruba henter y pa trahadornan den dialogo entre gobierno, sindicato y doño di trabao. Den e ocho aña di gobernacion di MEP a priminti dialogo, pero a bandona e forma di traha aki y a goberna casi pa decreto. Intzimidacion y persecucion politico tabata toca esnan cu no tabata di acuerdo cu e gobierno di MEP. Den e periodo aki no a mehora mucho  den leynan y condicionnan di trabou pa trahadornan na Aruba. Sigur no den sector publico. Den sector publico trahadornan a bay atras cu 24% den nan forsa di compra, mientras cu prijs di coriente a subi cu 250%. E trahadornan mester a welga shete siman pa nan haya 105 florin. Den e periodo di gobierno di AVP a institui dialogo social pa atende cu temanan di economia, forsa di compra, pensioen, seguro medico, belasting, inversionnan den economia, bahamento di prijs di awa y coriente, seguridad y enseñansa. Den e periodo aki e salario anual di trahadornan di gobierno y maestronan di scol a bay dilanti cu 5000 florin, nan a haya indexering cu a wordo para pa ocho aña y nan pensioen a wordo poni bek na cobertura di 100%. E indexering a inclui e pensionadonan aunke nan no tabata den servicio mas. Pa trahadornan den sector priva a introduci e reparatietoeslag pa esnan cu salario te 2400 florin y a introduci e seguro di pensioen general pa tur trahado den sector priva. Den futuro nan tambe lo tin dos fuente di pensioen: e pensioen di behez y e pensioen cu nan mes y nan compania ta crea. Tur esaki via dialogocu respet di tur, pa tur. Si bo wak djis esaki, sin conta e tension y intrankilidad cu conflicto y confrontacion ta trece, sin conta e mensa y intimidacion manera MEP ta practica, nos tin tur motibo na Aruba pa sigui cu dialogo pa hunto bay dilanti!

Expresionnan haci den e articulo aki no necesariamente ta refleha opinion di ArenaPoliti.co