Plaza Padu ta keda inaugura durante celebracion di 30 aña di Status Aparte

ORANJESTAD- Na comienso di e aña aki un ceremonia modesto di ‘groundbreaking’ di Plaza Padu a start. Plaza Padu cu ta wordo traha den un estilo di ‘Binnenhof’ ya ta den un estado avansa ta keda dilanti di e edificio di Cocolishi na Bestuurskantoor. Plaza Padu ta parti di e vision di e actual gobierno pa loke ta renobacion di Centro di Ciudad. E vision aki ta birando un realidad den cada faceta. Trabou a bay segun plan y ya caba a drenta e di dos fase di construccion di Plaza Padu.

Plaza dedica na Padu Lampe

E persona na kende e Plaza ta dedica ta Juan Chabaya Lampe ‘Padu’. Un shon di hende, stima y aprecia pa tur cu conoce. Un persona sumamente talentoso, creativo y inspirativo. Padu ta un di e co-autornan di nos himno nacional. Banda di ta un musico cu a produci cancionnan inolvidabel manera e di e dos himno di Aruba ‘Abo So’, Padu ta tambe un pintor y un autor di bukinan metafisico. Pero mas ainda Padu ta un luchado di prome ora di nos Status Aparte. E lucha di e humilde pueblo Arubiano na inicio di siglo pasa. Un lucha sagrado, un anhelo grandi, un deseo cu despues di hopi contratiempo a keda realisa na 1986. Otro aña Aruba ta celebra cu 30 aña pasa e anhelo di e pueblo a keda cumpli y esey ta e momento cu Plaza Padu ta keda inaugura. Miho momento no ta posibel pa recorda e lucha y un di e pioneronan di e lucha aki pa Aruba por tabata ‘baas den su mes cas’. Nos himno ta bise masha cla mes. ‘Nos amor pa bo ta asina grandi cu no tin nada pa kibr’e. Mescos ta e amor incondicional cu Aruba henter tin pa Padu, e icono Arubiano, nos tata di cultura. E palabranan den nos himno produci pa Padu ta papia di cordialidad di nos hendenan, di stimacion pa otro y bunitesa di nos isla. Na momento di ceremonia di groundbreaking di Plaza Padu Prome Minister Eman a elogia Padu cu e siguiente palabranan. “Ta poco personalidad nos tin na Aruba cu a duna un contribucion na e aspecto politico y e desaroyo constitucional y a duna un contribucion valioso pa eternidad den crea e vinculonan entre nos como ciudadanonan cu e suelo stima di nos dushi tera Aruba”.

Tambe Eman a expresa cu Plaza Padu ta na honor di Padu, pero ni cuanto Plaza duna Padu y ni con grandi e Plaza ta, nunca esaki por expresa e grandura di gratitud pa loke Padu a nifica pa historia di pais Aruba. E dia ey den momentonan nostalgico, recordando historia y repasando loke a sosode Prome Minister Eman a bisa Padu “Cu e Plaza aki nos kier bisa Padu cu nos ta stima bo y reconoce bo den tur sentido di palabra pa loke bo ta nifica pa nos”.

Awe Prome Minister Mike Eman ta un persona berdaderamente orguyoso y contento cu a cuminsa cu e di dos fase di Plaza Padu. Na momento cu algun aña pasa miembronan di Gabinete Mike Eman den oposicion e tempo ey, a para duro pa no bende Bestuurskantoor, tabata pa e vision cu tabatin con ta mira e rol di Bestuurskantoor. Un centro di gobernacion cu ampliacion y su propio plaza, estilo Binnenhof como parti di renobacion di Centro di Ciudad. Esey ta loke ta tumando luga.

Expresionnan haci den e articulo aki no necesariamente ta refleha opinion di ArenaPoliti.co