Chris Romero (MEP):

12 Mil cas cu chens di keda sin servicio di awa y prome Minister ta gaba cu cos ta bon na Aruba

Weekend a habri hopi negativo pa nos comunidad mirando cu WEB Aruba NV a avisa cu tin 30% di consumidor cu debe habri serca nan.

E parti mas alarmante di tur esaki ta cu e mas cu 12 mil hendenan aki ta haya unicamente 2 dia pa paga nan debe, of nan servicio di awa lo keda suspendi.

12 mil hende cu no a bay paga nan cuenta di awa ta un suma astronomico cu por traduci unicamente na e realidad tristo cu nos pueblo ta bibando actualmente. Nos pueblo ta sufriendo danki na e costo halto di bida. Awendia cabesnan di famia tin cu disidi entre paga awa cu coriente, of cumpra cuminda.

Estadisticanan ta mustra cu pobresa na Aruba ta aumentando drasticamente, aña pa aña.

Instacianan social ta sclama pa ayudo pa por cumpli cu e demanda halto cu nan ta hayando di famianan den necesidad, y pa colmo Gobierno ta corta nan subsidio.

Pero asina mes Prome Minister ta gaba cu cos ta bon na Aruba, y kier sigi purba manipula e realidad bisando cu casi no tin pobresa na nos isla.

Ta parse cu pa prome Minister ta mas importante pa traha proyecto di embeyesemento di nos infrastructura, cu pone atencion na e emergencia social cu nos pais ta pasando aden aworaki.

Ta bisto cu e prioridad di Mike Eman ta di logra su “green dream” sacrificando e bienestar di nos comunidad.

12 mil cas cu cuenta habri di awa ta bisanos cla y raspa cu nos comunidad ta sufriendo!

Nos tristo realidad actual na Aruba ta mustra nos cu mientras cu Gobierno di Mike Eman ta concentra den gasta placa di pueblo den show mediatico pa nan campaña politico, nos pueblo mes ta pasando den duro.

E ta un tristesa pa mira con Gobierno di Mike Eman ta hasiendo fiesta tur caminda, sin tene piedad cu e 12 mil famianan cu ta sufriendo, y cu lo tin chens di keda sin awa na nan cas.